'അനസിനെ ഫിറോസ് മർദിച്ചത് ബാറ്റുകൊണ്ട്'; പാലക്കാട് യുവാവ് മരിച്ച സംഭവത്തിൽ ദൃശ്യങ്ങൾ മീഡിയവണിന്
രണ്ട് തവണ അടികൊണ്ട അനസ് ഉടൻ തന്നെ നിലത്ത് വീഴുകയായിരുന്നു
Update: 2022-06-22 06:30 GMT
പാലക്കാട്: പാലക്കാട് നഗരത്തിൽ ദുരൂഹ സാഹചര്യത്തിൽ മരിച്ച നിലയിൽ കണ്ടെത്തിയ യുവാവ് അനസിനെ പ്രതി ഫിറോസ് ബാറ്റു കൊണ്ട് മർദിക്കുന്ന ദൃശ്യങ്ങൾ മീഡിയവണിന് ലഭിച്ചു. രണ്ട് തവണ അടികൊണ്ട അനസ് ഉടൻ തന്നെ നിലത്ത് വീഴുകയായിരുന്നു. ബൈക്കിലെത്തിയ ഫിറോസിനൊപ്പം മറ്റൊരാൾ കൂടിയുണ്ടെന്ന് ദൃശ്യങ്ങളിൽ നിന്ന് വ്യക്തമാണ്. തുടർന്ന് അനസിനെ ഫിറോസ് ഓട്ടോറിക്ഷയിൽ എടുത്ത് കയറ്റുന്നതും ദൃശ്യങ്ങളിൽ കാണാം. വിക്ടോറിയ കോളേജിനു മുന്നിൽ വെച്ചാണ് അനസിനെ ഫിറോസ് മർദിക്കുന്നത്.
ഇന്നലെയാണ് പാലക്കാട് നഗരത്തിൽ മാനസിക രോഗിയായ അനസ് മർദനമേറ്റ് മരിച്ചത്. സംഭവത്തിൽ നരികുത്തി സ്വദേശി ഫിറോസിനെ നോർത്ത് പൊലീസ് കസ്റ്റഡിയിലെടുത്തു. അനസിനെ മർദിച്ചതായി കസ്റ്റഡിയിലുള്ള ഫിറോസ് മൊഴി നൽകിയിരുന്നു. ലേഡീസ് ഹോസ്റ്റൽ പരിസരത്ത് മോശമായി പെരുമാറിയപ്പോഴാണ് ഇടപ്പെട്ടതെന്നും ബാറ്റ് കൊണ്ട് തലക്ക് അബദ്ധത്തിൽ അടിച്ചെന്നും ഫിറോസ് പറഞ്ഞു. അനസിന്റെ മൃതദേഹം പാലക്കാട് ജില്ലാ ആശുപത്രിയിൽ സൂക്ഷിച്ചിരിക്കുകയാണ്.