പ്ലസ് വൺ സീറ്റ് പ്രതിസന്ധി: സംസ്ഥാനത്ത് വിദ്യാർഥി പ്രതിഷേധം
ഭരണപക്ഷ വിദ്യാർഥി സംഘടനയായ എസ്.എഫ്.ഐയും ഇന്ന് പ്രതിഷേധവുമായി തെരുവിലിറങ്ങുന്നുണ്ട്.
Update: 2024-06-24 05:15 GMT
കോഴിക്കോട്: മലബാറിലെ പ്ലസ് വൺ സീറ്റ് പ്രതിസന്ധി പരിഹരിക്കണമെന്ന് ആവശ്യപ്പെട്ട് സംസ്ഥാനത്ത് ശക്തമായ വിദ്യാർഥി പ്രതിഷേധം. ഭരണപക്ഷ വിദ്യാർഥി സംഘടനയായ എസ്.എഫ്.ഐയും ഇന്ന് പ്രതിഷേധവുമായി തെരുവിലിറങ്ങുന്നുണ്ട് എന്നതാണ് ശ്രദ്ധേയം. കെ.എസ്.യു, എം.എസ്.എഫ്, ഫ്രറ്റേണിറ്റി സംഘടനകളും പ്രതിഷേധം സംഘടിപ്പിച്ചിട്ടുണ്ട്.
മലപ്പുറത്ത് എം.എസ്.എഫ് വനിതാ പ്രവർത്തകർ ആർ.ഡി.ഡി ഓഫീസ് ഉപരോധിച്ചു. പ്രവർത്തകരെ പൊലീസ് അറസ്റ്റ് ചെയ്തു നീക്കി. കോഴിക്കോടും മലപ്പുറത്തും കെ.എസ്.യു പ്രവർത്തകരും ആർ.ഡി.ഡി ഓഫീസ് ഉപരോധിക്കുന്നുണ്ട്. കോഴിക്കോട്ട് കെ.എസ്.യു പ്രവർത്തകരും പൊലീസും തമ്മിൽ ഉന്തും തള്ളുമുണ്ടായി. മലപ്പുറത്ത് ഫ്രറ്റേണിറ്റിയുടെ നേതൃത്വത്തിൽ വിദ്യാർഥികളും രക്ഷിതാക്കളും റോഡ് ഉപരോധിക്കും.