'പ്രായമായ പശുക്കളെ ബിജെപിക്കാരുടെ വീടിന് മുന്‍പില്‍ കെട്ടൂ, അപ്പോഴറിയാം സ്നേഹം'

വോട്ടിനായി പശുക്കളെ സ്‌നേഹിക്കുന്നതായി ബിജെപി ഭാവിക്കുകയാണെന്ന് ലാലുപ്രസാദ് യാദവ്

കറവ വറ്റിയ പ്രായമായ പശുക്കളെ ബിജെപി നേതാക്കളുടെ വീടിന് മുമ്പിൽ കെട്ടിയിട്ടാൽ അപ്പോഴറിയാം പശുവിനോടുള്ള അവരുടെ സ്നേഹത്തിന്‍റെ തനിനിറമെന്ന് ആര്‍ജെഡി നേതാവ് ലാലു പ്രസാദ് യാദവ്. വോട്ടിനായി പശുക്കളെ സ്‌നേഹിക്കുന്നതായി ബിജെപി ഭാവിക്കുകയാണ്. ബിജെപിക്ക് പശു സ്‌നേഹമല്ല. പകരം വോട്ട് സ്‌നേഹമാണെന്ന് ലാലുപ്രസാദ് യാദവ് പറഞ്ഞു.

പാര്‍ട്ടി എക്‌സിക്യുട്ടിവ് മീറ്റിങ്ങിനിടെയാണ് ബിജെപിയുടെ പശുസ്‌നേഹത്തെ ലാലുപ്രസാദ് യാദവ് കളിയാക്കിയത്. ഗോരക്ഷ എന്ന പേരില്‍ ഇവർ ന്യൂനപക്ഷത്തെയാണ് ഉന്നം വെയ്ക്കുന്നത്. പാലിന് വേണ്ടിയല്ല വോട്ടിനു വേണ്ടിയാണ് അവർ ഇങ്ങനെ ചെയ്യുന്നതെന്നും അദ്ദേഹം പറഞ്ഞു.

ബിജെപിയുടെ പശുസ്നേഹത്തിലെ കാപട്യം പുറത്തുകൊണ്ടുവരാന്‍ മുന്നോട്ടുവരണമെന്ന് ലാലു പ്രസാദ് അണികളോട് ആഹ്വാനം ചെയ്തു.