വീണ്ടും നിരാശ; വെങ്കല മെഡൽ പോരാട്ടത്തിൽ ലക്ഷ്യ സെന്നിന്​ തോൽവി

പാരിസ്​: പ്രതീക്ഷ വാനോളമുയർത്തിയ ശേഷം നിരാശയുമായി ലക്ഷ്യ സെന്നിന്​ മടക്കം. ഒളിമ്പിക്​സ്​ പുരുഷ ബാഡ്​മിൻറണിലെ വെങ്കല മെഡൽ പോരാട്ടത്തിൽ മലേഷ്യയുടെ ലി സിജിയയോടാണ്​ ലക്ഷ്യ സെൻ തോൽവി വഴങ്ങിയത്​. ആദ്യ ഗെയിം 21-13ന്​ ആധികാരികമായി വിജയിച്ച ലക്ഷ്യ തുടർന്നുള്ള സെറ്റുകളിൽ പരാജയപ്പെടുകയായിരുന്നു.

കൈമുട്ടിലുള്ള മുറിവ് വകവെക്കാതെ പോരാടിയ ലക്ഷ്യക്ക്​ രണ്ടാം സെറ്റിലും മൂന്നാം സെറ്റിലും പിഴച്ചു. എതിരാളിയുടെ നീക്കങ്ങൾ ഗണിച്ചെടുക്കുന്നതിൽ ലക്ഷ്യക്ക്​ വന്ന പിഴവുകൾ ലി കൃത്യമായി മുതലെടുത്തു. രണ്ടാം ഗെയിമിൽ 21-16നും മൂന്നാം ഗെയിമിൽ 21-11നുമായിരുന്നു ലിയുടെ വിജയം. ഒളിമ്പിക്​സ്​ ബാഡ്​മിൻറൺ മെഡൽ നേടുന്ന ആദ്യ ഇന്ത്യൻ പുരുഷ താരമെന്ന നേട്ടമാണ്​ ലക്ഷ്യക്ക്​ കൈയ്യകലെ നഷ്​ടമായത്​. ഈ വിഭാഗത്തിലെ സ്വർണ മെഡൽ പോരാട്ടത്തിൽ ത നിലവിലെ ഒളിമ്പിക്​ ചാമ്പ്യനായ അക്​സൽസൺ മെഡൽ നിലനിർത്തി.

സെമിയിൽ അക്​സൽസണിനെതിരെ രണ്ടുസെറ്റുകളിലും മുന്നിട്ടുനിന്ന ശേഷമായിരുന്നു ലക്ഷ്യയുടെ തോൽവി. നേരത്തേ ക്വാർട്ടറിൽ ചൈനീസ്​ തായ്​​പേയിയുടെ ചൗ ടിയൻ ചെന്നിനെ മലർത്തിയടിച്ചാണ്​​​ ലക്ഷ്യ​ സെമിയിലേക്ക്​ കടന്നത്​. ഇതോടെ ഒളിമ്പിക്​സ്​ പുരുഷ ബാഡ്​മിൻറണിൽ സെമിയിലെത്തുന്ന​ ആദ്യ ഇന്ത്യൻ താരമായി മാറിയിരുന്നു.