ഗസ്സയിലെ കൂട്ടക്കുരുതിക്ക് ആറുമാസം; കെയ്റോയിൽ ഇന്ന് വീണ്ടും വെടിനിർത്തൽ ചർച്ച

കെയ്റോ: ഗസ്സയിലെ യുദ്ധം ആറു മാസം പിന്നിടുന്ന വേളയിൽ കെയ്റോയിൽ ഇന്ന്​ വീണ്ടും വെടിനിർത്തൽ ചർച്ച. റമദാനിൽ വെടിനിർത്തലിനായി ദോഹയിലും കെയ്റോയിലും നടന്ന ചർച്ച പരാജയപ്പെട്ടിരിക്കെയാണ്​ പുതിയ ചർച്ചയ്ക്ക് വേദിയൊരുങ്ങുന്നത്. ഹമാസ്​ സംഘം ഇന്ന്​ കെയ്റോയിലെത്തും. മൊസാദ്​ മേധാവിയുടെ നേതൃത്വത്തിൽ ഇസ്രായേൽ സംഘവും ഇന്ന്​ കെയ്റോയിലേക്ക്​ തിരിക്കും എന്നാണ്​ റിപ്പോർട്ട്​.

ഹമാസ്​ ഉപാധികളിൽ അന്തിമതീരുമാനം കൈക്കൊള്ളാൻ ഇസ്രായേൽ യുദ്ധകാര്യ മന്ത്രിസഭാ യോഗം ഇന്ന്​ ചേരും. മുൻ ഉപാധികളിൽ വിട്ടുവീഴ്ചക്കില്ലെന്ന്​ ഹമാസ്​ ആവർത്തിച്ചു. ആക്രമണം പൂർണമായി നിർത്തുക, സൈന്യം ഗസ്സ വിടുക, പുറന്തള്ളിയവർക്ക്​ മടങ്ങിയെത്താൻ അവസരം ഒരുക്കുക എന്നിവയാണ്​ ഹമാസ്​ മുന്നോട്ടുവെച്ച പ്രധാന ഉപാധികൾ.

സന്നദ്ധ പ്രവർത്തകരുടെ കൊലയും ഗസ്സയിലെ സിവിലിയൻ കുരുതിയും ലോകത്തൊന്നാകെ ഇസ്രായേൽ വിരുദ്ധവികാരം ശക്തമാക്കിയിരിക്കെ വെടിനിർത്തൽ കരാറിനുള്ള സമ്മർദം ശക്തമാണ്. അതേസമയം, ഇസ്രായേലിൽ നെതന്യാഹുവിനെതിരെ പ്രതിഷേധം കനക്കുകയാണ്. ബന്ദികളുടെ മോചനം ഇനിയും നീണ്ടാൽ വൻ പ്രക്ഷോഭത്തിന്​ തയാറാകുമെന്ന്​ ബന്ധുക്കൾ ആവർത്തിച്ചു. ഇന്ന​ലെ രാത്രി തെൽ അവീവിൽ നടന്ന നെതന്യാഹു വിരുദ്ധ പ്രക്ഷോഭകർക്കെതിരെ സുരക്ഷാ വിഭാഗം നടത്തിയ ബലപ്രയോഗത്തിൽ മൂന്ന്​ പേർക്ക്​ പരിക്കേറ്റു. എത്രയും പെ​ട്ടെന്ന്​ വെടിനിർത്തൽ കരാറിലൂടെ ബന്ദികളെ മോചിപ്പിക്കണമെന്നാണ്​ പ്രക്ഷോഭകരുടെ ആവശ്യം. 

ഗസ്സയുടെ പല ഭാഗങ്ങളിലും വ്യാപക ആക്രമണം തുടരുകയാണ്​ ഇസ്രായേൽ. ഖാൻ യൂനുസിലും മറ്റുമായി ചെറുത്തുനിൽപ്പ്​ പോരാളികൾ നടത്തിയ ആക്രമണത്തിൽ 14 സൈനികർ കൊല്ലപ്പെട്ടതായി അൽഖസ്സാം ബ്രിഗേഡ്​ അറിയിച്ചു. ഖാൻ യൂനുസിലും പരിസരങ്ങളിലും കഠിന പോരാട്ടമാണ്​ നടക്കുന്നതെന്ന്​ ഇസ്രായേൽ സൈനിക വക്താവും​ പ്രതികരിച്ചു. അതിനിടെ, ചെങ്കടലിൽ ഒരു കപ്പലിനു നേരെ വീണ്ടും ഹൂത്തികളുടെ ആക്രമണമുണ്ടായി. ഗസ്സയിലേക്ക്​ ഭക്ഷണവും വഹിച്ചുളള കൂടുതൽ ട്രക്കുകൾ വന്നുതുടങ്ങിയിട്ടുണ്ട്. സന്നദ്ധ പ്രവർത്തകരെ കൊലപ്പെടുത്തിയത്​ ബോധപൂർവമല്ലെന്ന ഇസ്രായേൽ വിശദീകരണം വേൾഡ്​ സെൻട്രൽ കിച്ചൺ തള്ളിയിരുന്നു. സംഭവത്തെ കുറിച്ച്​ സ്വതന്ത്ര അന്വേഷണം വേണമെന്നും സംഘടന ആവശ്യപ്പെട്ടു.