ജുബൈലോത്സവം വെള്ളിയാഴ്ച സമാപിക്കും

സംഗമം യൂത്ത് ലീഗ് സംസ്ഥാന പ്രസിഡന്റ് മുനവ്വറലി ശിഹാബ് തങ്ങൾ ഉദ്ഘാടനം ചെയ്യും

സൌദിയിലെ ദമ്മാം കെഎംസിസി ജുബൈൽ സെൻട്രൽ കമ്മിറ്റി സംഘടിപ്പിച്ചു വന്ന ജുബൈലോത്സവം വെള്ളിയാഴ്ച സമാപിക്കും. സമാപനത്തോടനുബന്ധിച് നടക്കുന്ന സാംസ്‌കാരിക സംഗമം വെള്ളിയാഴ്ച നടക്കും. സംഗമം യൂത്ത് ലീഗ് സംസ്ഥാന പ്രസിഡന്റ് മുനവ്വറലി ശിഹാബ് തങ്ങൾ ഉദ്ഘാടനം ചെയ്യും.

ജുബൈലോത്സവത്തിന്റെ ഭാഗമായി വിവിധ പരിപാടികളാണ് മൂന്നു മാസക്കാലമായി സംഘടിപ്പിച്ചു വന്നത്. കുടുംബ സംഗമം, പാചക മത്സരം, മൈലാഞ്ചിയിടല്‍ മത്സരം, ഫുട്ബോൾ ടൂർണമെന്റ്, ബാറ്റിൽ ഓഫ് ബ്രെയിൻസ് പ്രശ്നോത്തരി, ഖവ്വാലി ആലാപനം തുടങ്ങിയ വിവിധ പരിപാടികള്‍ ഉത്സവത്തോടനുബന്ധിച്ച് സംഘടിപ്പിച്ചു. മത്സരങ്ങളിലെ വിജയികൾക്കുള്ള സമ്മാനദാനം വെള്ളിയാഴ്ച നടക്കുന്ന സാംസ്‌കാരിക സംഗമത്തിൽ നിര്‍വഹിക്കും. വിവിധ മത്സരങ്ങളുടെ അവസാന റൌണ്ട് മത്സരവും അന്ന് നടക്കും. പുതുതായി തെരഞ്ഞെടുക്കപ്പെട്ട കെ.എം.സി.സി കിഴക്കൻ മേഖല ഭാരവാഹികൾക്കുള്ള സ്വീകരണവും ഇതോടനുബന്ധിച്ച് നടക്കും. പ്രവിശ്യയിലെ വിവിധ സാമൂഹിക സാംസ്‌കാരിക പ്രവർത്തകരും പരിപാടിയില്‍ പങ്കെടുക്കും. വിവിധ കലാ പ്രകടനങ്ങളും, സംഗീത വിരുന്നും പരിപാടിയുടെ ഭാഗമായി നടക്കും. യു എ റഹീം, മുഹമ്മദലി ഫാസ്, അഷ്‌റഫ് ചെട്ടിപ്പടി, നൗഷാദ് തിരുവനന്തപുരം, അബ്‌ദുൽ സലാം എന്നിവർ വാർത്താ സമ്മേളനത്തിൽ പങ്കെടുത്തു.