പുതുവൽസരാഘോഷത്തിനൊരുങ്ങി ദുബൈ: വിവിധ ഗതാഗത നിയന്ത്രണങ്ങൾ പ്രഖ്യാപിച്ചു

ദുബൈ: പുതുവൽസരാഘോഷത്തിന്‍റെ ഭാഗമായി ദുബൈ നഗരത്തിൽ നടപ്പിലാക്കുന്ന വിവിധ ഗതാഗാത നിയന്ത്രണങ്ങൾ പ്രഖ്യാപിച്ചു. ആഘോഷം പ്രയാസരഹിതമാക്കാനും ജനങ്ങളുടെ യാത്ര സുഖകരമാക്കാനും ലക്ഷ്യം വെച്ചാണിത്​.​ ദുബൈ പൊലീസുമായി സഹകരിച്ചാണ്​ റോഡ്​ ഗതാഗത അതോറിറ്റി നടപടികൾ തീരുമാനിച്ചത്. യാത്രക്കാരുടെ തിരക്ക്​​ പരിഗണിച്ച്​ മെട്രോയുടെ ഗ്രീൻ, റെഡ്​ ലൈനുകളിലെ സർവീസ്​ ജനുവരി രണ്ടിന്​ അർധരാത്രി വരെ തുടരും. ശനിയാഴ്ച രാവിലെ 6 മുതൽ തിങ്കളാഴ്ച പുലർച്ചെ 1 വരെ ദുബൈ ട്രാമും സർവീസ് നടത്തും. ആഘോഷ സ്ഥലങ്ങളിലേക്ക്​ എല്ലാ സന്ദർശകരുടേയും സുഗമമായ യാത്ര ഉറപ്പാക്കാൻ എല്ലാ സാങ്കേതിക സഞ്ചാരങ്ങളും വിന്യസിക്കുമെന്ന്​ അധികൃതർ പറഞ്ഞു. മൾട്ടി ലെവൽ പാർക്കിങ്​ ടെർമിനലുകൾ ഒഴികെയുള്ള മുഴുവൻ പാർക്കിങ്​ സ്ഥലങ്ങളിലും ഞായറാഴ്ച സൗജന്യമായിരിക്കും. ബസ്​ സർവീസുകൾ രാവിലെ 6 മുതൽ പുലർച്ചെ ഒന്നുവരെയായിരിക്കും.

തിരക്ക് കുറക്കുന്നത്​ പരിഗണിച്ച്​ ദുബൈയിൽ 32 സ്ഥലങ്ങളിൽ കരിമരുന്ന്​ പ്രയോഗങ്ങൾ സംഘടിപ്പിക്കുമെന്ന് അധികൃതർ അറിയിച്ചിട്ടുണ്ട്​. വെടിക്കെട്ടുകൾക്ക്​ പുറമെ കുടുംബങ്ങൾക്കും കുട്ടികൾക്കും അടക്കം ആസ്വദിക്കാനായി നിരവധി സംഗീത പരിപാടികളും ഡ്രോൺ ഷോകളും ഒരുക്കിയിട്ടുണ്ട്​. ദുബൈ ഷോപ്പിങ്​ ഫെസ്റ്റിവലിന്‍റെ ഭാഗമായുള്ള പരിപാടികൾ കൂടി ചേരുമ്പോൾ മുൻവർഷങ്ങളേക്കാൾ വിപുലമായ സൗകര്യങ്ങളാണ്​ പുതുവൽസരാഘോഷത്തിനായി ഇത്തവണ ഒരുങ്ങുന്നത്​. ലോകത്തിലെ ഏറ്റവും ഉയരം കൂടിയ കെട്ടിടമായ ബുർജ് ഖലീഫയിൽ വിസ്മയിപ്പിക്കുന്ന കാഴ്ചയാകും അരങ്ങേറുക. ​ ദുബൈ ഫ്രെയിം, ബ്ലൂവാട്ടേഴ്സ്, ദി ബീച്ച്, ജെ.ബി.ആർ, ബുർജ് അൽ അറബ് എന്നിവയുൾപ്പെടെ മറ്റ് പ്രധാന ലാൻഡ്‌മാർക്കുകളിലും ആഘോഷപരിപാടികൾ നടക്കും.