സീ യു ദേര്‍; ദുബൈ എക്സ്പോയുടെ പ്രചരണത്തിന്‍റെ ഭാഗമായി അണിഞ്ഞൊരുങ്ങി എമിറേറ്റ്സ് വിമാനം

ദുബൈ എക്സ്പോയുടെ സന്ദേശം ആകാശം വഴിയും ലോകത്തെ അറിയിക്കും. ദുബൈയുടെ വിമാന കമ്പനിയായ എമിറേറ്റ്​സ്​ എയർലൈൻസിന്‍റെ വിമാനങ്ങൾ സീയു ദേര്‍ എന്ന സന്ദേശവാചകവുമായി പറക്കും. ഒക്ടോബർ ഒന്നിന് ആരംഭിക്കുന്ന എക്സ്പോയിലേക്ക്​ ലോക രാജ്യങ്ങളിൽ നിന്ന് വൻതോതിൽ സന്ദർശകർ എത്തിച്ചേരുമെന്നാണ്​ പ്രതീക്ഷ.

പ്രത്യേകം ഡിസൈൻ ചെയ്​ത എ 380 വിമാനമാണ്​ ഇതിനായി പറക്കുക​. 'സീ യൂ ദേര്‍' എന്ന്​ രേഖപ്പെടുത്തിയ വിമാനം പച്ച, ഓറഞ്ച്​, പർപ്പിള്‍,, ചുവപ്പ് തുടങ്ങി 11​ നിറങ്ങളിലാണ്​ ഡിസൈൻ ചെയ്​തിരിക്കുന്നത്​. എക്​സ്​പോയുടെ ഭാഗമായി മാറാനുള്ള സന്ദേശവും വിമാനം നൽകുന്നുണ്ട്​. വിമാനചിറകുകളുടെ ചുവടെയുള്ള എൻജിൻ കൗളുകളിൽ എക്​സ്​പോയുടെ തീയതിയും കുറിച്ചിരിക്കുന്നു. എമിറേറ്റ്​സിന്‍റെ പ്രചാരണത്തിനായി ബുർജ ഖലീഫയുടെ മുകളിൽ ഷൂട്ട്​ ചെയ്​ത്​ വൈറലായ എയർഹോസ്​റ്റസി​ന്‍റെ ചിത്രവും പതിച്ചിട്ടുണ്ട്​. ലോസ്​ ആഞ്ചൽസിലേക്കാണ്​ ആദ്യം വിമാനം പറക്കുക.

മൂന്ന്​ വിമാനങ്ങളാണ്​ എക്​സ്​പോക്കായി രൂപം മാറ്റുന്നത്​. എമിറേറ്റ്​സി​ന്‍റെ സംഘം തന്നെയാണ്​പൂർണമായും പെയിൻറിങും ഡിസൈനിങ്ങും ചെയ്​തത്​. വിമാനം പൂർണമായും പെയിൻറ്​ ചെയ്​തിട്ടുണ്ട്​. 16 ദിവസംകൊണ്ടാണ്​ വിമാനത്തെ എക്​സ്​പോക്കായി അണിയിച്ചൊരുക്കിയത്​.