സൗജന്യ പാർക്കിങ് സംവിധാനങ്ങൾ അടച്ചു പൂട്ടുന്നു: ഷാർജയിൽ പാർക്കിങ്ങിന് ചെലവേറും

ഒഴിഞ്ഞ സ്ഥലങ്ങളിലെ സൗജന്യ പാർക്കിങ്​ സംവിധാനങ്ങൾ അടച്ചുപൂട്ടുന്നതോടെ ഷാർജയിൽ പാർക്കിങ് ​ചെലവ് കൂടും. താമസക്കാർ പണം നൽകിയുള്ള പബ്ലിക്​ പാർക്കിങ്ങോ പ്രൈവറ്റ് ​പാർക്കിങ്ങോ ആശ്രയിക്കണം. 

ഷാർജയിലെ പല സ്ഥലങ്ങളിലും പെയ്​ഡ്​ പാർക്കിങ്ങുണ്ടെങ്കിലും നഗരത്തിന്‍റെ വിവിധ ഭാഗങ്ങളിലെ ഒഴിഞ്ഞ സ്ഥലങ്ങളിലും മറ്റും സൗജന്യമായി പാർക്ക്​ചെയ്യാമായിരുന്നു. ഈ സ്ഥലങ്ങൾ ഓരോന്നായി അടച്ചുപൂട്ടുകയാണ്​ അധികൃതർ. . വർഷങ്ങളായി പൊതു പാർക്കിങ്​ ഏരിയകൾ വികസിപ്പിക്കാനും നടപടി സ്വീകരിച്ചു വരുന്നു​. എമി​റേറ്റിന്‍റെ സൗന്ദര്യവത്​രണവും യാത്രക്കാരുടെ സൗകര്യവും പരിഗണിച്ചാണ്​ കൂടുതൽ പാർക്കിങ്​ ഏരിയകൾ വികസിപ്പിക്കുന്നത്​.

നിലവിൽ 57,000ഓളം പൊതുപാർക്കിങ്ങുകൾ ഷാർജയിലുണ്ട്​. ഇവ ദുരുപയോഗം ചെയ്യുന്നില്ലെന്ന് ​അധികൃതർ ഉറപ്പുവരുത്തുന്നുണ്ട്​. ഒക്​ടോബറിൽ 53 സൗജന്യ പാർക്കിങ്​ കേന്ദ്രങ്ങൾ അടച്ചുപൂട്ടിയിരുന്നു. പകരം 2440 പുതിയ പാർക്കിങ്​ തുറക്കുകയും ചെയ്തു. സൗജന്യ പാർക്കിങ്​ അടക്കുന്നതോടെ സ്വകാര്യ പാർക്കിങ് ​ഓപറേറ്റർമാർ ഫീസ് ​വർധിപ്പിക്കുന്നതായും ആരോപണമുണ്ട്​. ഒരു മാസത്തേക്ക്​ എന്ന നിരക്കിൽ വാടകക്ക്​ നൽകുന്നവരാണ്​ നിരക്ക്​ വർധിപ്പിക്കുന്നത്​.