ഗസ്സ ജനതക്ക് കൈത്താങ്ങുമായി യു.എ.ഇ കപ്പൽ

യു.എ.ഇ: ഗസ്സയിലെ ജനതക്ക്​ ആശ്വാസം പകരാൻ ഭക്ഷ്യധാന്യം ഉൾപ്പെടെ നിരവധി ജീവകാരുണ്യ ഉൽപന്നങ്ങളുമായി യു.എ.ഇ കപ്പൽ. ഫുജൈറയിൽ നിന്ന്​ പുറപ്പെട്ട കപ്പൽ ഈജിപ്തിലെ അൽ അരിഷ്​ നഗരത്തിൽ നങ്കൂരമിട്ടു. മൊത്തം 4,016 ടൺ ഉൽപന്നങ്ങളാണ്​ കപ്പലിലുള്ളത്​. രണ്ടര മാസത്തോളമായി തുടരുന്ന യുദ്ധത്തെ തുടർന്ന്​ ദുരിതത്തിലായ ഗസ്സ നിവാസികൾക്ക്​ കൂടുതൽ സഹായം ഉറപ്പാക്കാനുള്ള നീക്കത്തിന്‍റെ ഭാഗം കൂടിയാണിത്​.

420 ടൺ താൽക്കാലിക പാർപ്പിട സൗകര്യങ്ങളും 131 ടൺ വൈദ്യ സഹായവും കൈമാറിയത്​ ഖലീഫാ ബിൻ സായിദ്​ ആൽ നഹ്​യാൻ ഫൗണ്ടേഷനാണ്​. സായിദ്​ ബിൻ സുൽത്താൻ ആൽ നഹ്​യാൻ ചാരിറ്റബ്​ൾ ആൻഡ്​ ഹ്യുമാനിറ്റേറിയൻ ഫൗണ്ടേഷനും ഇതിൽ കൈകോർത്തു.റഫ അതിർത്തി മുഖേന ഉൽപന്നങ്ങൾ എത്രയും വേഗം ഗസ്സയിൽ എത്തിക്കാനുള്ള നടപടിയാണ്​പുരോഗമിക്കുന്നത്​.

ഗാലൻറ്​ നൈറ്റ്​ മൂന്ന് എന്ന പേരിൽ ഗസ്സക്ക്​ സാന്ത്വനം പകരാൻ വിപുലമായ ജീവകാരുണ്യ പദധതികൾക്കാണ്​ യു.എ.ഇ പ്രസിഡൻറ്​ ശൈഖ്​ മുഹമ്മദ്​ ബിൻ സായിദ്​ ആൽ നഹ്​യാൻ നേരത്തെ ഉത്തരവിട്ടത്​. കുടിവെള്ള വിതരണം ഉൾപ്പെടെ നിരവധി പദ്ധതികളും ഇതി​െൻറ ഭാഗമായി യു.എ.ഇ ഗസ്സയിൽ നടപ്പാക്കി വരികയാണ്​. ഈ മാസം മാത്രം ഏതാണ്ട്​ എണ്ണായിരത്തോളം ടൺ ജീവകാരുണ്യ ഉൽപന്നങ്ങളാണ്​ യു.എ.ഇ മുൻകൈയെടുത്ത്​ ഗസ്സയിൽ എത്തിച്ചത്​.