എങ്ങനെ വേണമെങ്കിലും കഴിക്കാം, ഒന്നല്ല പത്താണ് ഗുണങ്ങൾ; ചൂടുകാലത്തെ ബെസ്റ്റ് ഓപ്‌ഷൻ

പുഴുങ്ങിയോ പാതിവേവിച്ചോ ഓംലറ്റ് ആക്കിയോ ഏത് രീതിയിൽ വേണമെങ്കിലും കഴിക്കാം. ഈ ചൂടുകാലത്ത് ഭക്ഷണത്തിൽ ഉൾപ്പെടുത്താൻ ഏറ്റവും നല്ലതാണ് മുട്ട. സമീകൃതാഹാരത്തിൽ ഒഴിവാക്കാൻ കഴിയാത്ത ഒന്നാണല്ലോ ഈ കുഞ്ഞൻ ഭക്ഷണം. ഉയർന്ന ഗുണമേന്മയുള്ള പ്രോട്ടീൻ്റെ മികച്ച ഉറവിടമാണ്. പേശികളുടെ ആരോഗ്യത്തിനും രോഗപ്രതിരോധത്തിനും മൊത്തത്തിലുള്ള ആരോഗ്യത്തിനും അത്യന്താപേക്ഷിതമായ ഒന്ന്. പാകം ചെയ്യാൻ വളരെ എളുപ്പമാണ്, എങ്കിലും പലർക്കും മുട്ട കഴിക്കാൻ മടിയാണ്. എന്നാൽ, ഒന്നല്ല മുട്ട കഴിച്ചാൽ കിട്ടുന്ന പത്ത് ആരോഗ്യഗുണങ്ങൾ മനസിലാക്കിയാലോ! 

പ്രോട്ടീൻ ആവശ്യത്തിന് 

നമ്മുടെ ശരീരത്തിൻ്റെ വളർച്ചയ്ക്കും മറ്റ് പ്രവർത്തനങ്ങൾക്കും ആവശ്യമായ ഒൻപത് അവശ്യ അമിനോ ആസിഡുകളും അടങ്ങിയ ഉയർന്ന ഗുണമേന്മയുള്ള പ്രോട്ടീൻ്റെ ഒരു മികച്ച ഉറവിടമാണ് മുട്ട. പേശികൾക്ക് ബലം നൽകുകയും രോഗപ്രതിരോധ സംവിധാനം ശക്തിപ്പെടുത്തുകയും ചെയ്യും. ശരീരഭാരം നിയന്ത്രിക്കാനും ഈ പ്രോട്ടീനുകൾ സഹായിക്കും. 

പോഷകസമൃദം 

വിറ്റാമിൻ എ, വിറ്റാമിൻ ഡി, വിറ്റാമിൻ ഇ, വിറ്റാമിൻ ബി 12, റൈബോഫ്ലേവിൻ, ഫോളേറ്റ്, ഇരുമ്പ്, സെലിനിയം, സിങ്ക് എന്നിവയുൾപ്പെടെ അവശ്യ വിറ്റാമിനുകളും ധാതുക്കളും മുട്ടയിൽ അടങ്ങിയിട്ടുണ്ട്. ആരോഗ്യകരമായ ചർമ്മം നിലനിർത്തുക, മസ്തിഷ്ക ആരോഗ്യം നിലനിർത്തുക, ഊർജ്ജ നിലകൾ വർദ്ധിപ്പിക്കുക, എല്ലുകളും പല്ലുകളും ശക്തിപ്പെടുത്തുക എന്നിങ്ങനെ ഈ പോഷകങ്ങൾ നിർണായക പങ്കുവഹിക്കുന്ന പ്രവർത്തനങ്ങൾ നിരവധിയാണ്. 

കണ്ണിന്റെ സംരക്ഷണം 

കണ്ണിൻ്റെ ആരോഗ്യത്തിന് ആവശ്യമായ രണ്ട് ശക്തമായ ആൻ്റിഓക്‌സിഡൻ്റുകളായ ല്യൂട്ടിൻ, സിയാക്സാന്തിൻ എന്നിവയാൽ സമ്പന്നമാണ് മുട്ട. ഈ സംയുക്തങ്ങൾ ഹാനികരമായ അൾട്രാവയലറ്റ് (UV) പ്രകാശത്തിൽ നിന്ന് കണ്ണുകളെ സംരക്ഷിക്കുന്നു. പ്രായമായവരിൽ കാഴ്ച നഷ്ടപ്പെടാനുള്ള പ്രധാന കാരണമായ മാക്യുലർ ഡീജനറേഷൻ്റെ അപകടസാധ്യത കുറയ്ക്കാനും ഇത് സഹായിക്കുന്നു. 

തലച്ചോറിന്റെ പ്രവർത്തനം 

മുട്ടയിൽ ധാരാളമായി കാണപ്പെടുന്ന കോളിൻ, മസ്തിഷ്ക വികസനത്തിനും പ്രവർത്തനത്തിനും പ്രധാനമാണ്. ഗർഭകാലത്തും ഭക്ഷണത്തിൽ ഉൾപ്പെടുത്താൻ ഡോക്ടർമാർ നിർദേശിക്കുന്ന ഒന്നാണ് മുട്ട. 

ഭാരം നിയന്ത്രിക്കുന്നു 

നിലവിൽ ഭാരം ശരിയായി നിയന്ത്രിക്കുക എന്നത് പലരും നേരിടുന്ന പ്രധാന പ്രശ്നങ്ങളിൽ ഒന്നാണ്. ഭക്ഷണത്തിൽ മുട്ട ഉൾപ്പെടുത്തുന്നത് ശരീരഭാരം നിയന്ത്രിക്കാൻ സഹായിക്കും. മുട്ടയിലെ ഉയർന്ന പ്രോട്ടീൻ ശരിയായ ഗുണങ്ങൾ ശരീരത്തിൽ എത്തിക്കും. അമിതമായി ഭക്ഷണം കഴിക്കാനുള്ള ആസക്തി കുറയ്ക്കുകയും ചെയ്യും. 

പേശികളുടെ ശക്തി 

മുട്ടയിലെ പ്രോട്ടീൻ പേശികളുടെ വളർച്ചയ്ക്ക് മാത്രമല്ല, പേശികളുടെ പുനരുദ്ധാരണത്തിനും അത്യാവശ്യമാണ്. വ്യായാമത്തിന് ശേഷം മുട്ട കഴിക്കുന്നത് വ്യായാമ വേളയിൽ നഷ്ടപ്പെടുന്ന അമിനോ ആസിഡുകൾ ശരീരത്തിലേക്ക് തിരിച്ചെത്തിക്കാനും പേശികളുടെ വളർച്ചയ്ക്കും സഹായകമാകും. 

അസ്ഥികളുടെ ആരോഗ്യം

കാൽസ്യം ആഗീരണം ചെയ്യാനും എല്ലുകളുടെ ആരോഗ്യത്തിനും ആവശ്യമായ വിറ്റാമിൻ ഡിയുടെ നല്ലൊരു ഉറവിടമാണ് മുട്ട. എല്ലുകളെ ശക്തവും ആരോഗ്യകരവും നിലനിർത്തുന്നതിനും ഒടിവുകൾ, ഓസ്റ്റിയോപൊറോസിസ് എന്നിവയ്ക്കുള്ള സാധ്യത കുറയ്ക്കുന്നതിനും മുട്ട കഴിക്കുന്നത് വളരെ ഗുണകരമാണ്. പ്രായമായവരാണ് ഇക്കാര്യം കൂടുതൽ ശ്രദ്ധിക്കേണ്ടത്. 

ചർമ്മത്തിൻ്റെ ആരോഗ്യം

വിറ്റാമിൻ എ, ഇ, സെലിനിയം, സിങ്ക് എന്നിവയുൾപ്പെടെ മുട്ടയിൽ കാണപ്പെടുന്ന പോഷകങ്ങൾ കോശങ്ങളുടെ പുനരുജ്ജീവനത്തെ പ്രോത്സാഹിപ്പിക്കും. കൊളാജൻ ഉൽപാദനത്തെ പിന്തുണയ്ക്കുന്നതിലൂടെ ആരോഗ്യമുള്ള ചർമം നൽകുകയും ചെയ്യും. 

കഴിക്കാൻ എളുപ്പം 

ഭക്ഷണത്തിൽ ഉൾപ്പെടുത്താൻ ഏറ്റവും മികച്ച ഒരു ഓപ്‌ഷനാണ് മുട്ട. വേവിച്ചോ, സലാഡ് രൂപത്തിലോ, സാൻഡ്‌വിച്ചുകൾ, ഓംലെറ്റുകൾ എന്നിവ പോലുള്ള വിവിധ വിഭവങ്ങളിൽ ഉൾപ്പെടുത്തിയോ മുട്ട കഴിക്കാവുന്നതാണ്.