മെട്രോയിൽ യാത്ര ചെയ്ത് നിർമല സീതാരാമൻ; വീഡിയോ വൈറൽ

ന്യൂഡൽഹി: ഡൽഹി മെട്രോയിൽ യാത്ര ചെയ്ത് കേന്ദ്ര ധനകാര്യ മന്ത്രി നിർമല സീതാരാമൻ. ലക്ഷ്മി നഗറിലേക്ക് നടത്തിയ യാത്രയിൽ മന്ത്രി സഹയാത്രികരുമായി ആശയവിനിമയം നടത്തി. മന്ത്രിയുടെ ഔദ്യോഗിക എക്സ് ഹാൻഡിലിൽ യാത്രയിൽ നിന്നുള്ള ചിത്രങ്ങളും സഹയാത്രികരുമായി ചിത്രങ്ങൾ എടുക്കുന്നതിന്റെ വീഡിയോകളും പങ്കുവെച്ചു. ബി.ജെ.പിയുടെ ഈസ്റ്റ് ഡൽഹി ലോക്‌സഭാ സ്ഥാനാർഥി ഹർഷ് മൽഹോത്രക്കുവേണ്ടിയുള്ള തെരഞ്ഞെടുപ്പ് പ്രചാരണ പരിപാടിയിൽ പങ്കെടുക്കാൻ പോകുകയായിരുന്നു കേന്ദ്ര ധനമന്ത്രി.

സംഭവത്തിൽ നെറ്റിസൺസിന്റെ ഭാഗത്തുനിന്ന് പലതരത്തിലുള്ള അഭിപ്രായങ്ങളാണ് പുറത്തുവന്നിരിക്കുന്നത്. മന്ത്രിയായിരുന്നിട്ടും പൊതുഗതാഗത സംവിധാനമാണ് ഉപയോഗിക്കുന്നതെന്ന് ചില നെറ്റിസൺസ് അഭിനന്ദിച്ചപ്പോൾ ലോക്സഭാ തെരഞ്ഞെടുപ്പിനിടയിലെ വെറും നാടകം മാത്രമാണിതെന്ന് ചിലർ പറഞ്ഞു.

ലോക്സഭാ തെരഞ്ഞെടുപ്പിന് ശേഷം മികച്ച ഭൂരിപക്ഷത്തോടെ പ്രധാനമന്ത്രി നരേന്ദ്ര മോദി അധികാരത്തിൽ തിരിച്ചെത്തുമെന്ന് സീതാരാമൻ നേരത്തെ ആത്മവിശ്വാസം പ്രകടിപ്പിച്ചിരുന്നു.