'ഒന്നുകിൽ സീറ്റ് കൂടി, അല്ലെങ്കിൽ കുറഞ്ഞു...ആരുടെ കൂടെയാണെങ്കിലും ഉദ്ധവിന്റെ ശിവസേനക്ക് നിരാശ' - നവനീത് റാണ

ന്യൂഡൽഹി: ശിവസേന യുബിടി വിഭാഗത്തിന് നേരെ കടുത്ത വിമർശനവുമായി ബിജെപി നേതാവും മുൻ എംപിയുമായ നവനീത് റാണ. ഏത് സഖ്യത്തിനൊപ്പമാണെങ്കിലും ഉദ്ധവിന്റെ ശിവസേനയ്ക്ക് നിരാശയാണെന്നാണ് നവനീതിന്റെ വിമർശനം. നിയമസഭാ തെരഞ്ഞെടുപ്പിൽ ശിവസേന യുബിടി ഒറ്റയ്ക്ക് മത്സരിക്കണമായിരുന്നു എന്ന സഞ്ജയ് റൗട്ടിന്റെ പ്രസ്താവനയ്ക്ക് മറുപടിയായാണ് നവനീത് വിമർശനം ഉന്നയിച്ചത്.

"ഉദ്ധവ് താക്കറെയുടെ പാർട്ടി നേതാക്കൾ പറയുന്നത്, അവർ ഒറ്റയ്ക്ക് മത്സരിക്കുകയായിരുന്നെങ്കിൽ കൂടുതൽ സീറ്റ് കിട്ടിയേനെ എന്നാണ്. ഏത് സഖ്യത്തിന്റെ കൂടെയാണെങ്കിലും അവർക്കെന്തെങ്കിലും പരാതിയുണ്ടാകും എന്നാണെനിക്ക് തോന്നുന്നത്. ബിജെപിയുടെ കൂടെ ചേർന്ന് സീറ്റ് കൂടുതൽ കിട്ടിയാൽ പരാതി, സീറ്റ് കുറഞ്ഞാലും നിരാശ. അവർക്ക് വസ്തുതകൾ അംഗീകരിക്കാൻ ബുദ്ധിമുട്ടാണ്" നവനീത് പറയുന്നു.

മഹാരാഷ്ട്ര നിയമസഭാ തെരഞ്ഞെടുപ്പ് ഫലം പുറത്തെത്തിയതിന് പിന്നാലെയാണ് ശിവസേനയ്ക്ക് ഒറ്റയ്ക്ക് മത്സരിക്കാമായിരുന്നു എന്ന നിരാശ സഞ്ജയ് റാവത്ത് പങ്കുവച്ചത്. എന്നാൽ ഒരിക്കലും മഹാവികാസ് അഘാഡി സഖ്യത്തിൽ നിന്ന് വിട്ടുനിൽക്കില്ലെന്നും അദ്ദേഹം കൂട്ടിച്ചേർത്തിരുന്നു.