'ഇടതുപക്ഷം നേടിയത് ഐതിഹാസിക ജയം' എ വിജയരാഘവന്‍
വിജയരാഘവന്‍ പാര്‍ട്ടി സെക്രട്ടറി ആയതിന് ശേഷം ഇടതുപക്ഷം നേടുന്ന രണ്ടാമത്തെ മിന്നുന്ന വിജയമാണ് ഇന്നത്തേത്. തദ്ദേശ തെരഞ്ഞെടുപ്പില്‍ വിജയരാഘവന്‍റെ നേതൃത്വത്തിലുള്ള ഇടതുമുന്നണി വലിയ തരംഗമാണ് സംസ്ഥാനത്ത് ഉണ്ടാക്കിയത്.
Update: 2021-05-02 11:54 GMT
സംസ്ഥാന തെരഞ്ഞെടുപ്പ് ഫലം ചരിത്രത്തിലെ തന്നെ ഐതിഹാസിക വിജയമെന്ന് എല്‍.എഡി.എഫ് കണ്‍വീനറും സി.പി.എം സംസ്ഥാന സെക്രട്ടറിയുമായ എ.വിജയരാഘവന്‍. വിജയരാഘവന്‍ പാര്‍ട്ടി സെക്രട്ടറി ആയതിന് ശേഷം ഇടതുപക്ഷം നേടുന്ന രണ്ടാമത്തെ മിന്നുന്ന വിജയമാണ് ഇന്നത്തേത്. തദ്ദേശ തെരഞ്ഞെടുപ്പില്‍ വിജയരാഘവന്‍റെ നേതൃത്വത്തിലുള്ള ഇടതുമുന്നണി വലിയ തരംഗമാണ് സംസ്ഥാനത്ത് ഉണ്ടാക്കിയത്. അതിന് ശേഷം നടക്കുന്ന ആദ്യ നിയമസഭാ തെരഞ്ഞെടുപ്പിന്‍റെ ഫലമാണ് ഇന്ന് പുറത്തുവന്നത്.
'തെരഞ്ഞെടുപ്പിന്‍റെ എല്ലാ പ്രചാരണഘട്ടത്തിലും തികഞ്ഞ ആത്മവിശ്വാസത്തിലാണ് ഇടതുപക്ഷം മുന്നോട്ടുപോയത്. തെരഞ്ഞെടുപ്പ് ഘട്ടത്തിലുണ്ടായ പ്രീ പോള്‍ സര്‍വേകളും എക്സിറ്റ് പോളുകളും വരുന്നതിന് മുമ്പ് തന്നെ ഇടതുപക്ഷം വിജയം ഉറപ്പിച്ചിരുന്നു. ഗവര്‍ണ്‍മെന്‍റ് എന്ന നിലയില്‍ കഴിഞ്ഞ അഞ്ച് വര്‍ഷം നടത്തിയ ഏറ്റവും മികച്ച ഭരണനിര്‍വഹണത്തിനും മുഖ്യമന്ത്രി പിണറായി വിജയന്‍റെ പ്രവര്‍ത്തന മികവിനും ജനം തന്ന അംഗീകാരമാണ് ഈ വിജയം. നരേന്ദ്രമോദിയുടെ ഭരണത്തിന് കീഴിലുള്ള ഇന്ത്യയുടെ അവസ്ഥ എത്രത്തോളം പരാജയപ്പെട്ടു എന്ന് കണ്ടറിയുന്ന സന്ദര്‍ഭത്തില്‍ കൂടിയാണ് സംസ്ഥാനത്ത് തുടര്‍ഭരണം വരുന്നത്'. വിജയരാഘവന്‍ പറഞ്ഞു