അയൽവാസിയുമായി വാക്കുതർക്കം; യുവ അഭിഭാഷകന് വെടിയേറ്റു

കൊല്ലം: കൊല്ലം കൊട്ടാരക്കരയിൽ യുവ അഭിഭാഷകന് വെടിയേറ്റു. കൊട്ടാരക്കര പുലമൺ സ്വദേശി മുകേഷിനാണ് എയർ ഗൺ കൊണ്ട് വെടിയേറ്റത്.  കേസിൽ രണ്ടുപേരെ അറസ്റ്റ് ചെയ്തു. 

ഇന്നലെ രാത്രി പതിനൊന്ന് മണിയോടെയായിരുന്നു സംഭവം. തുടർന്ന് മുകേഷിന്റെ സുഹൃത്ത് പ്രൈമിനെ പോലീസ് അറസ്റ്റ് ചെയ്തു. അയൽവാസികൾ കൂടിയായ ഇരുവരും തമ്മിൽ നേരത്തെ തന്നെ തർക്കങ്ങളുണ്ടായിരുന്നു. ഇന്നലെയുണ്ടായ വാക്കുതർക്കത്തെ തുടർന്ന് പ്രൈം മുകേഷിന്റെ വീട്ടിൽ അതിക്രമിച്ചു കയറി. മുകേഷിന്റെ അച്ഛനെ മർദിക്കുകയും അമ്മക്ക് നേരെ അസഭ്യവർഷം നടത്തുകയും ചെയ്തു. 

ശേഷം എയർ ഗൺ ഉപയോഗിച്ച് മുകേഷിന് നേരെ വെടിയുതിർക്കുകയായിരുന്നു. മുകേഷിന്റെ തോളെല്ലിനാണ് വെടിയേറ്റത്. ഉടൻ തന്നെ ഇദ്ദേഹത്തെ തിരുവനന്തപുരം മെഡിക്കൽ കോളേജിലേക്ക് കൊണ്ടുപോയി. ആരോഗ്യനില ഗുരുതരമല്ല. ശസ്ത്രക്രിയ നടത്തി ഇന്ന് തന്നെ വെടിയുണ്ട പുറത്തെടുക്കുമെന്ന് ഡോക്ടർമാർ അറിയിച്ചിട്ടുണ്ട്. പരാതിയെ തുടർന്ന് കൊട്ടാരക്കര പൊലീസാണ് പ്രൈമിനെ അറസ്റ്റ് ചെയ്തത്. ഇയാൾക്കൊപ്പമുണ്ടായിരുന്ന സുഹൃത്തിനെയും പോലീസ് അറസ്റ്റ് ചെയ്തു.