വൈറലാകാൻ ബൈക്കോടിച്ച് ഫേസ്ബുക്ക് ലൈവ്; കൈയോടെ പൊക്കി ആർ.ടി.ഒ

ഇടുക്കി: പെട്രോൾ ഇല്ലാത്ത പമ്പ് എന്തിനാണ് ചെറുതോണിയിൽ? ചോദ്യം ന്യായമാണ്. പക്ഷേ പ്രതികരിച്ച രീതിയാണ് പ്രശ്‌നം. ഷാജി പാപ്പൻ എന്ന ഫേസ്ബുക്ക് പേജിലായിരുന്നു ഇടുക്കി നായർപാറ സ്വദേശി വിഷ്ണുവിന്റെ ലൈവ്. അതും ബൈക്ക് ഓടിച്ച് നടുറോട്ടിൽ!

സോഷ്യൽ മീഡിയയിൽ വൈറലാകാനായിരുന്നു വിഷ്ണുവിന്റെ സാഹസിക ലൈവ്. ഇത് ശ്രദ്ധയിൽപ്പെട്ട ഇടുക്കി ആർ.ടി.ഒ ആർ. രമണൻ വിഷ്ണുവിനെ വിളിച്ചുവരുത്തുകയായിരുന്നു. യുവാവിന്റെ ഡ്രൈവിങ് ലൈസൻസ് മൂന്നു മാസത്തേക്ക് സസ്‌പെൻഡ് ചെയ്യുകയും ഇടുക്കി മെഡിക്കൽ കോളജിൽ മൂന്ന് ദിവസത്തെ സാമൂഹിക സേവനത്തിന് ഉത്തരവിടുകയും ചെയ്തു. മലപ്പുറത്തെ ഐ.ഡി.ടി.ആർ ട്രെയിനിങ്ങിൽ സ്വന്തം ചെലവിൽ പങ്കെടുക്കാനും നിർദേശം നൽകിയിട്ടുണ്ട്.

അപകടകരമായ ഡ്രൈവിങ് വ്യാപകമാകുന്നതിന്റെ പശ്ചാത്തലത്തിൽ പരിശോധന കർശനമാക്കുമെന്നും നടപടികൾ കടുപ്പിക്കുമെന്നും ആർ.ടി.ഒ അറിയിച്ചു.

Summary: RTO caught the young man who rode a bike and went live on Facebook to go viral