കിഴക്കമ്പലത്ത് തെരുവ് നായകള്‍ 1500 ഓളം താറാവുകളെ കടിച്ചുകൊന്നു

കിഴക്കമ്പലത്ത് തെരുവ് നായകൾ താറാവുകളെ കടിച്ചു കൊന്നു. പഴങ്ങനാട് സ്വദേശിയായ ജോസ് ആന്‍റണിയുടെ 1500 ഓളം താറാവുകളെയാണ് തെരുവ് നായകൾ ആക്രമിച്ച് കൊന്നത്.

തിങ്കളാഴ്ച വെളുപ്പിന് 5 മണിയോടുകൂടിയാണ് പഴങ്ങനാട് കടമ്പ്രയാറിന് സമീപമുള്ള ജോസിന്‍റെ താറാവ് വളർത്തൽ കേന്ദ്രത്തിൽ തെരുവുനായ ആക്രമണം ഉണ്ടായത്. രണ്ടായിരത്തി അഞ്ഞൂറോളം താറാവുകളാണ് കൂട്ടിലുണ്ടായിരുന്നത്. 1500 ഓളം താറാവുകൾ ആക്രമണത്തിൽ ചത്തൊടുങ്ങി. ബാക്കിയുള്ളവക്ക് നായയുടെ ആക്രമണത്തിൽ പരിക്കേറ്റു.

പാരമ്പര്യമായി താറാവ് കൃഷിയാണ് ജോസിന്‍റെ വരുമാന മാർ​ഗവും. 3 ലക്ഷത്തിലധികം രൂപയുടെ നഷ്ടം സംഭവിച്ചതായാണ് പ്രാഥമിക വിലയിരുത്തൽ. വളർത്തു മൃ​ഗങ്ങൾക്കും മനുഷ്യർക്കും നേരേ ഈ പ്രദേശത്ത് മുമ്പും തെരുവ് നായ്ക്കളുടെ അക്രമണം ഉണ്ടായിട്ടുണ്ട്.