മീൻ കൊടുക്കാത്തതിനെ ചൊല്ലി തർക്കം; മത്സ്യ കച്ചവടക്കാരനെ കുത്തിക്കൊലപ്പെടുത്തി

കൊച്ചി: എറണാകുളം  മുനമ്പത്ത് മധ്യവയസ്കനെ കുത്തിക്കൊന്നു. മുനമ്പം മിനി ഫിഷിംഗ് ഹാർബറിലെ മത്സ്യ കച്ചവടക്കാരനായ മുനമ്പം കടുങ്ങി വീട്ടിൽ ബാബു (52)ആണ് കൊല്ലപ്പെട്ടത്. കഴുപ്പിള്ളി തറയിൽ വീട്ടിൽ പ്രവീൺ (31) നെ മുനമ്പം പോലീസ് അറസ്റ്റ് ചെയ്തു. മീൻ ചോദിച്ചിട്ട് നൽകാത്തതിലെ വിരോധം കാരണം ബാബുവിനെ പ്രവീൺ കുത്തിക്കൊലപ്പെടുത്തുകയായിരുന്നു. ഇന്ന് രാവിലെ 9.45 ന് ആയിരുന്നു സംഭവം.

മീൻ ഇടപാടുമായി ബന്ധപ്പെട്ട് ഇരുവർക്കുമിടയിൽ വാക്ക് തർക്കം ഉണ്ടായിരുന്നു. കച്ചവടം കഴിഞ്ഞ് വീട്ടിലേക്ക് പോയ ബാബുവിനെ പിന്തുടർന്ന് പ്രതി വീട്ടിൽ എത്തുകയും കയ്യിൽ കരുതിയിരുന്ന കത്തി ഉപയോഗിച്ച് കഴുത്തിനു കുത്തുകയുമായിരുന്നു. ആശുപത്രിയിൽ എത്തിച്ചെങ്കിലും രക്ഷിക്കാനായില്ല. മൃതദേഹം ഇൻക്വസ്റ്റിന് ശേഷം കളമശേരി മെഡിക്കൽ കോളേജാശുപത്രിയിലേക്ക് മാറ്റി.