പുതുക്കാട് ചരക്ക് ട്രെയിൻ പാളം തെറ്റി; നാല് ട്രെയിനുകൾ റദ്ദാക്കി

തൃശൂർ പുതുക്കാട് ഗുഡ്സ് ട്രെയിൻ പാളം തെറ്റിയതിനെ തുടർന്ന് നാല് ട്രെയിനുകൾ റദ്ദാക്കി. വേണാട് എക്സ്പ്രസ്, ഷാെർണൂർ -  എറണാകുളം മെമു, എറണാകുളം - ഗുരുവായൂർ എക്സ്പ്രസ്, പാലരുവി എക്സ്പ്രസ് എന്നീ ട്രെയിനുകളാണ് റദ്ദാക്കിയത്. ഒപ്പം നാളെ രാവിലത്തെ  മൂന്ന് ട്രെയിനുകളും റദ്ദാക്കി. തിരുവനന്തപുരത്ത് നിന്നുള്ള വേണാട് എക്സ്പ്രസ്, കോട്ടയം - നിലമ്പൂർ എക്സ്പ്രസ്, ഷൊർണൂർ - എറണാകുളം മെമു എന്നിവയാണ് റദ്ദാക്കിയ ട്രെയിനുകള്‍. നാളെ രാവിലെയോടുകൂടി ഗതാഗതം പുനസ്ഥാപിക്കാനാകുമെന്നാണ് പ്രതീക്ഷയെന്ന് റെയിൽവെ അറിയിച്ചു.

ഇന്ന് വൈകുന്നേരമാണ് തൃശൂർ പുതുക്കാട് ഗുഡ്സ് ട്രെയിൻ പാളം തെറ്റിയത്. ഗുഡ്സ് ട്രെയിനിന്റെ എൻജിനും നാല് ബോഗികളുമാണ് പാളം തെറ്റിയത്. ഇതിനെത്തുടര്‍ന്ന്  തൃശൂർ - എറണാകുളം റൂട്ടിൽ ട്രെയിൻ ഗതാഗതം തടസ്സപ്പെട്ടിരിക്കുകയാണ്. തൃശൂർ നിന്ന് പാലക്കാട് ഭാഗത്തേക്കുള്ള ട്രാക്കിലാണ് തടസം. ഇരുമ്പനം ബി.പി.സി.എല്ലില്‍ ഇന്ധനം നിറക്കാൻ പോയ ട്രെയിനാണ് പാളം തെറ്റിയത്. എറണാകുളത്ത് നിന്ന് ക്രെയിൻ കൊണ്ട് വന്ന് ബോഗികൾ  മാറ്റുകയാണ്.