ഇ-പോസ് മെഷീന് സാങ്കേതിക തകരാർ: സംസ്ഥാനത്ത് റേഷൻ വിതരണം തടസ്സപ്പെട്ടത് മണിക്കൂറുകൾ

തിരുവനന്തപുരം: സംസ്ഥാനത്തെ റേഷൻ വിതരണം മണിക്കൂറുകളോളം തടസപെട്ടു. ഇ പോസ് മെഷീനിന്റെ സാങ്കേതിക തകരാറാണ് റേഷൻ വിതരണം തടസപെടാൻ കാരണം. ആർക്കും മനപൂർവം റേഷൻ നിഷേധിക്കുന്നില്ലെന്ന് ഭക്ഷ്യമന്ത്രി ജി.ആർ അനിൽ സംഭവത്തോട് പ്രതികരിച്ചു.

ഇന്ന് രാവിലെയാണ് ഇ-പോസ് മെഷീന്റെ സർവർ തകരാറിലായത്. തുടർന്ന് പല റേഷൻ കടകളിലും ആളുകൾ എത്തി മടങ്ങി. ആളുകൾ കൂടുതൽ റേഷൻ വാങ്ങുന്ന മാസാവസാനമാണ് ഇ-പോസ് മെഷീനിന്റെ സർവർ തകരാറിലാകുന്നത്. കൂടുതൽ ഡാറ്റ സൂക്ഷിക്കാനുള്ള സങ്കേതിക സൗകര്യം ഇല്ലാത്തതാണ് നിലവിലെ പ്രശ്നം.

പരാതി ഉയർന്നതോടെ സാങ്കേതിക പ്രശ്നം പരിഹരിക്കാൻ ഭക്ഷ്യ മന്ത്രി ഉദ്യോഗസ്ഥർക്ക് നിർദേശം നൽകി. പിന്നാലെ 11 മണിയോട് കൂടി റേഷൻ വിതരണം പുനരാരംഭിച്ചു. സാങ്കേതികമായി ഇ പോസ് മെഷീനിലും, സർവറിലും മാറ്റം വരുത്തുകയാണ് പ്രതിസന്ധിക്കുള്ള പരിഹാരം എന്നാണ് വിദഗ്ധർ അറിയിക്കുന്നത്.