ഗുജറാത്തില്‍ ബിജെപിയെ അധികാരത്തില്‍ നിന്ന് പുറത്താക്കുമെന്ന് ആവര്‍ത്തിച്ച് ഹര്‍ദിക് പട്ടേല്‍
Update: 2018-05-25 21:34 GMT
തന്റെ സമുദായത്തിന് അര്‍ഹമായത് നേടിയെടുക്കുന്നതിനായി പ്രവര്‍ത്തിക്കുക തന്നെ ചെയ്യും. കോണ്‍ഗ്രസ് വിജയിച്ചാല്‍ അത് സ്വേച്ഛാധിപത്യത്തിനെതിരായ വിധിയെഴുത്താകുമെന്നും ഹര്‍ദിക് പട്ടേല്‍
ഗുജറാത്തില്‍ ബിജെപിയെ അധികാരത്തില്‍ നിന്ന് പുറത്താക്കുമെന്ന് ആവര്‍ത്തിച്ച് പട്ടേല്‍ പ്രക്ഷോഭ നേതാവ് ഹര്‍ദിക് പട്ടേല്‍. താന്‍ കോണ്ഗ്രസിന്റെ വിജയത്തിന് വേണ്ടിയല്ല പ്രവര്‍ത്തിക്കുന്നത്. എന്നാല്‍ തന്റെ സമുദായത്തിന് അര്‍ഹമായത് നേടിയെടുക്കുന്നതിനായി പ്രവര്‍ത്തിക്കുക തന്നെ ചെയ്യും. കോണ്‍ഗ്രസ് വിജയിച്ചാല്‍ അത് സ്വേച്ഛാധിപത്യത്തിനെതിരായ വിധിയെഴുത്താകുമെന്നും ഹര്‍ദിക് പട്ടേല്‍ പറഞ്ഞു.
തെരഞ്ഞെടുപ്പില്‍ കോണ്ഗ്രസിന്റെ വിജയത്തിനായി പ്രവര്‍ത്തിക്കുമെന്ന് വ്യക്തമായി പറയാത്തത് എന്തുകൊണ്ടെന്ന ചോദ്യത്തിന് തന്റെ പോരാട്ടം ഏതെങ്കിലും രാഷ്ട്രീയ പാര്‍ട്ടിക്ക് അനുകൂലമോ എതിരോ അല്ലെന്ന് ഹര്‍ദിക് പട്ടേല്‍ പറഞ്ഞു. നിലവിലെ സംവിധാനത്തിനെതിരെയാണ് സമരം. അവകാശങ്ങള്‍ക്കായി ജനാധിപത്യപരമായി ശബ്ദിക്കാനുള്ള തന്റെ അവകാശം നിഷേധിക്കുന്നതിരായാണ് സമരമെന്നും അദ്ദേഹം പറഞ്ഞു.
ബിജെപി പട്ടേല്‍ സമുദായത്തിന്‍റെ ആവശ്യങ്ങള്‍ അംഗീകരിക്കുകയാണെങ്കില്‍ പ്രക്ഷോഭം അവസാനിപ്പിക്കും. ഇല്ലെങ്കില്‍ പ്രക്ഷോഭം തുടരുക തന്നെ ചെയ്യുമെന്നും അദ്ദേഹം വ്യക്തമാക്കി. കഴിഞ്ഞ ദിവസം പട്ടേല്‍ സംവരണ പ്രക്ഷോഭത്തിനിടെ രജിസ്റ്റര്‍ ചെയ്ത കേസുകളില്‍ ഭൂരിഭാഗവും പിന്‍വലിച്ച് ഗുജറാത്തിലെ ബിജെപി സര്‍ക്കാര്‍ പട്ടേല്‍ സമുദായത്തെ സ്വാധീനിക്കാന്‍ ശ്രമിച്ചിരുന്നു. എന്നാല്‍ സംവരണ ആവശ്യം നേടിയെടുക്കും സമരം ചെയ്യുമെന്നാണ് ഹര്‍ദിക് പട്ടേല്‍ വ്യക്തമാക്കിയത്.