അസ്‍ലന്‍ഷാ കപ്പ്: ഇന്ത്യന്‍ ടീമിനെ ശ്രീജേഷ് നയിക്കും
Update: 2017-08-23 05:22 GMT
യുവതാരങ്ങള്‍ക്ക് പ്രാധാന്യം നല്‍കിയാണ് ഇത്തവണ ടീമിന്റെ ഘടന. കിരീടത്തില്‍ കുറഞ്ഞതൊന്നും ശ്രീജേഷിന്റെ യുവസംഘം ലക്ഷ്യമിടുന്നില്ല.
അസ്‍ലന്‍ഷാ കപ്പ് ഹോക്കി ടൂര്‍ണമെന്റിനുള്ള ഇന്ത്യന്‍ ടീമിനെ മലയാളി താരം പിആര്‍ ശ്രീജേഷ് നയിക്കും. യുവതാരങ്ങള്‍ക്ക് പ്രാധാന്യം നല്‍കിയാണ് ഇത്തവണ ടീമിന്റെ ഘടന. കിരീടത്തില്‍ കുറഞ്ഞതൊന്നും ശ്രീജേഷിന്റെ യുവസംഘം ലക്ഷ്യമിടുന്നില്ല.
ഏഴു യുവതാരങ്ങളാണ്‌ ടീമിന്റെ വേഗതയും കരുത്തും. ഇതേസമയം, മലേഷ്യയില്‍ നടക്കുന്ന ടൂര്‍ണമെന്റില്‍ ഇത്തവണ പാകിസ്താന്‍ ഇറങ്ങില്ല. ചാമ്പ്യന്‍ഷിപ്പിനുള്ള ടീമുകളുടെ എണ്ണം ആറായി കുറച്ചിട്ടുണ്ട്. നിലവിലെ രണ്ടാം സ്ഥാനക്കാരായ ഇന്ത്യക്ക് പ്രധാന വെല്ലുവിളി ഉയര്‍ത്തുക ഹോക്കി സ്റ്റിക്കില്‍ തന്ത്രങ്ങള്‍ മെനയുന്ന കരുത്തരായ ആസ്‌ട്രേലിയ തന്നെയാണ്. പ്രതിരോധ താരം ഗുരീന്ദര്‍ സിങ്ങും മധ്യനിര താരങ്ങളായ സുമിതും മന്‍പ്രീതും ഇന്ത്യന്‍ ടീമില്‍ അരങ്ങേറ്റം കുറിക്കും. മൂന്നു പേരും കഴിഞ്ഞ ഡിസംബറില്‍ ജൂനിയര്‍ ലോകകപ്പ് ചാമ്പ്യന്‍മാരായ ടീമിലെ അംഗങ്ങളാണ്. ഏപ്രില്‍ 24ന് തുടങ്ങുന്ന ചാമ്പ്യന്‍ഷിപ്പില്‍ ഇംഗ്ലണ്ട്, ജപ്പാന്‍, ന്യൂസിലന്‍ഡ്, മലേഷ്യ എന്നീ ടീമുകളും മാറ്റുരക്കും.