നദാലിനെ തോല്‍പിച്ച് ഫെഡറര്‍ക്ക് മയാമി ഓപ്പണ്‍ കിരീടം
Update: 2017-12-01 16:00 GMT
മയാമി ഓപ്പണില്‍ ഫെഡററുടെ മൂന്നാം കിരീടമാണിത്. ചാംപ്യന്‍ഷിപ്പിന്റെ ചരിത്രത്തില്‍ കിരീടം നേടുന്ന ഏറ്റവും പ്രായം ചെന്ന കളിക്കാരനുമായി സ്വിസ് താരം.
മയാമി ഓപ്പണിലും കിരീടം ചൂടി റോജര്‍ ഫെഡററുടെ മുന്നേറ്റം. ഫൈനലില്‍ റാഫേല്‍ നദാലിനെ നേരിട്ടുള്ള സെറ്റുകള്‍ക്ക് തോല്‍പ്പിച്ചു. ഈ വര്‍ഷം ഫെഡററുടെ മൂന്നാം കിരീടമാണിത്.
പരിക്കും പ്രായവും തളര്‍ത്താത്ത പോരാട്ട വീര്യവുമായാണ് ഫെഡ് എക്‌സ് പ്രസ് ഈ സീസണില്‍ കോര്‍ട്ടിലെത്തിയത്. ആസ്‌ത്രേലിയന്‍ ഓപ്പണ്‍ കിരീടത്തോടെ തുടങ്ങി ഇന്ത്യന്‍ വെല്‍സ് കിരീടവും കടന്ന് ഒടുവില്‍ മയാമിയിലും ഈ മുപ്പത്തഞ്ചുകാരന്‍ മുത്തമിട്ടു. ഏവരും കാത്തിരുന്ന ക്ലാസിക് പോരാട്ടത്തില്‍ റാഫേല്‍ നദാലിനെ നേരിട്ടുള്ള സെറ്റുകള്‍ക്കാണ് ഫെഡറര്‍ തകര്‍ത്തത്. ആദ്യ സെറ്റ് 6-3 നായിരുന്നു സ്വന്തമാക്കിയത്.
രണ്ടാം സെറ്റില്‍ നദാല്‍ തിരിച്ചുവരുമെന്ന് തോന്നിച്ചെങ്കിലും അതിന് അവസരം നല്‍കാതെ 6-4 ന് സെറ്റും കിരീടവും ഫെഡറര്‍ കൈപ്പിടിയിലൊതുക്കി. മയാമി ഓപ്പണില്‍ ഫെഡററുടെ മൂന്നാം കിരീടമാണിത്. ചാംപ്യന്‍ഷിപ്പിന്റെ ചരിത്രത്തില്‍ കിരീടം നേടുന്ന ഏറ്റവും പ്രായം ചെന്ന കളിക്കാരനുമായി സ്വിസ് താരം. നദാലിനെതിരെ ഫെഡറര്‍ ഈവര്‍ഷം നേടുന്ന മൂന്നാം ജയമാണിത്.