മെസിയുടെ മിന്നുകെട്ട്; ചിത്രങ്ങള്‍ കാണാം
Update: 2018-05-27 05:47 GMT
അര്‍ജന്റീനയിലെ റൊസാരിയോയിലുള്ള ഒരു ആഢംബര ഹോട്ടലില്‍ വച്ചായിരുന്നു വിവാഹം
കാല്‍പ്പന്തുകളിയിലെ മിശിഹായുടെ കല്യാണമായിരുന്നു ഇന്നലെ. ആരാധകര്‍ കാത്തിരുന്നതു പോലൊരു മാംഗല്യം. നൂറ്റാണ്ടിലെ കല്യാണം എന്നാണ് മെസിയുടെ വിവാഹത്തെ മാധ്യമങ്ങള്‍ വിശേഷിപ്പിച്ചത്. കാരണം താരത്തിളക്കത്താല്‍ സമ്പന്നമായിരുന്നു ഫുട്ബോള്‍ രാജകുമാരന്റെ മിന്നുകെട്ട്.
അര്‍ജന്റീനയിലെ റൊസാരിയോയിലുള്ള ഒരു ആഢംബര ഹോട്ടലില്‍ വച്ചായിരുന്നു വിവാഹം. വെളുത്ത ഗൌണണിഞ്ഞ് സുന്ദരിയായി അന്റോണല്ലയും സ്യൂട്ടില്‍ സുന്ദരനായി മെസിയും. സ്പാനിഷ് ഡിസൈനറായ റോസ ക്ലാരയാണ് ഗൌണ്‍ ഡിസൈന്‍ ചെയ്തത്. ഒപ്പം മൂന്നു മക്കളും.
ഫുട്ബോള്‍ താരങ്ങളായ നെയ്മര്‍, ലൂയിസ് സുവാരസ് തുടങ്ങിയവരോടൊപ്പം പോപ്പ് ഗായിക ഷക്കീറയും വിവാഹത്തില്‍ പങ്കെടുക്കാനെത്തിയിരുന്നു. ക്ഷണിക്കപ്പെട്ട് 260 പേരാണ് വിവാഹ ചടങ്ങില്‍ പങ്കെടുത്തത്. നൂറ്റമ്പതോളം മാധ്യമപ്രവര്‍ത്തകരും വിവാഹം റിപ്പോര്‍ട്ട് ചെയ്യാനെത്തിയിരുന്നു. വന്‍ സുരക്ഷാ സന്നാഹത്തിലായിരുന്നു വിവാഹം.
ബാല്യകാല സുഹൃത്തുക്കളാണ് മെസിയും കൂട്ടുകാരി അന്റോണെല്ലാ റൊക്കൂസോയും. ബാര്‍സിലോനയിലേക്ക് മെസി മാറിയതോടെ ആ കൂട്ടുകെട്ടും പിരിഞ്ഞുവെന്നാണ് ഏവരും കരുതിയത്. എന്നാല്‍ കളിക്കൂട്ടുകാരിയുമായി താന്‍ പ്രണയത്തിലാണെന്ന് 2008ല്‍ മെസി ഔദ്യോഗികമായി അറിയിക്കുകയായിരുന്നു. പിന്നീടെപ്പോഴും മെസിക്കൊപ്പം അന്റോണല്ലയേയും കണ്ടു. 2012ല്‍ ഇരുവര്‍ക്കും ആദ്യ കുഞ്ഞ് പിറന്നു .തിയാഗോ. 2015ല്‍ തിയാഗോയ്ക്ക് ഒരനുജനും.
(ചിത്രങ്ങള്‍ക്ക് കടപ്പാട്: AP,AFP)