'ഏതു ബാറ്റ്‌സ്മാനെതിരെ പന്തെറിയാനാണ് ബുദ്ധിമുട്ടിയത്'; ബുംറയുടെ മറുപടി ഇങ്ങനെ-വീഡിയോ

ന്യൂഡൽഹി: ലോക ക്രിക്കറ്റിലെ ഏറ്റവും മികച്ച ഡെത്ത്‌ബോളറാണ് ജസ്പ്രീത് ബുംറ. കഴിഞ്ഞ ടി20 ലോകകപ്പിൽ ഇന്ത്യയുടെ കിരീടനേട്ടത്തിൽ നിർണായകമായതും ബുംറയുടെ പ്രകടനമായിരുന്നു. ലോകകപ്പിന് ശേഷം വിശ്രമത്തിലായ താരം ശ്രീലങ്കക്കെതിരായ ഇന്ത്യയുടെ പര്യടനത്തിൽ കളിച്ചിരുന്നില്ല. ദുലീപ് ട്രോഫിക്കുള്ള ടീമിൽ നിന്നും വിശ്രമം നൽകി. ഇപ്പോഴിതാ താരത്തിന്റെ മറുപടി സമൂഹ മാധ്യമങ്ങളിൽ വൈറലായിരിക്കുന്നു. കഴിഞ്ഞ ദിവസം നടന്ന പൊതു ചടങ്ങിനിടെ തന്നെ ബുദ്ധിമുട്ടിച്ച ബാറ്റ്‌സമാൻ ആരാണെന്ന ചോദ്യം ബുംറക്ക് നേർക്കെത്തി. എന്നാൽ ഒരാളുടെ പേരും പറയാതെ തന്റെ ആത്മവിശ്വാസം വ്യക്തമാക്കുന്നതായിരുന്നു താരത്തിന്റെ മറുപടി.

 'നിങ്ങൾക്കൊരു നല്ല ഉത്തരം നൽകണമെന്ന് ആഗ്രഹിക്കുന്നു. എന്നാൽ യാഥാർത്ഥ്യമെന്തെന്നാൽ എന്റെ തലയിൽ കയറാൻ ഞാൻ ആരേയും അനുവദിക്കില്ല. ഞാൻ എല്ലാവരേയും ബഹുമാനിക്കുന്നു. എന്നാൽ ഞാൻ എന്നോട് തന്നെ സ്വയം പറയാറുള്ളത് നീ നിന്റെ ജോലി നന്നായി ചെയ്താൽ ലോകത്തിൽ ആർക്കും നിന്നെ തോൽപ്പിക്കാനോ തടുക്കാനോ ആവില്ലെന്നാണ്- കൈയടിയോടെയാണ് സദസ് താരത്തിന്റെ മറുപടി കേട്ടത്.

വരുന്ന ഐ.പി.എൽ സീസണിൽ മുംബൈ ഇന്ത്യൻസിൽ നിന്ന് 30 കാരൻ മറ്റൊരു ഫ്രാഞ്ചൈസിയിലേക്ക് മാറുമെന്ന അഭ്യൂഹം ശക്തമാണ്. നിലവിൽ ഇന്ത്യയുടെ മൂന്ന് ഫോർമാറ്റിലേയും പ്രധാന താരമാണ് ബുംറ. 36 ടെസ്റ്റുകളിലും 89 ഏകദിനങ്ങളിലും 70 ടി20യിലും ഇന്ത്യക്കായി കളത്തിലിറങ്ങി.