ഇക്കുറി കൂട്ടത്തല്ല്​; അർജൻറീന-ഫ്രാൻസ്​ വൈരം പുതിയ ഉയരത്തിൽ

പാരിസ്​: ഫ്രാൻസും അർജൻറീനയും തമ്മിലുള്ള വൈരവും കുടിപ്പകയും ഫുട്​ബോൾ സ്​പിരിറ്റി​െൻറ സകലസീമകളും ലംഘിക്കുന്നു. ഇരുടീമുകളിലെയും ​പ്രമുഖതാരങ്ങൾ അധികം ഇല്ലെങ്കിലും ഒളിമ്പിക്​സ്​ മൈതാനത്തെയും ആ പോര്​ ചൂട്​ പിടിപ്പിച്ചു.

ഒളിമ്പിക്​സ്​ ഫുട്​ബോൾ ക്വാർട്ടറിൽ ഫ്രാൻസും അർജൻറീനയും ഏറ്റമുട്ടുന്നു എന്ന വാർത്ത പുറത്തുവന്നതിന്​ പിന്നാലെത്തന്നെ എല്ലാം പ്രതീക്ഷിച്ചതായിരുന്നു. മത്സരത്തി​െൻറ കിക്കോഫ്​ മുതൽ ഫ്രഞ്ച്​ കാണികൾ അർജൻറീനയെ കൂവിയാർത്തു. മത്സരത്തി​െൻറ അഞ്ചാം മിനുറ്റിൽ ഫിലിപ്പ്​ മറ്റേറ്റയുടെ ഹെഡർ ഗോളിൽ മുന്നിലെത്തിയ ഫ്രഞ്ച്​ പടക്ക്​ മറുപടി നൽകാൻ ഹാവിയർ മഷ​റാനോയുടെ കുട്ടികൾക്കായില്ല. ഫൈനൽ വിസിലിന്​ പിന്നാലെ ഒരു അമേച്വർ ഫുട്​ബോൾ ടൂർണമെൻറിലേതുപോലെ ഇരു ടീമുകളും മൈതാനത്ത്​ കൂട്ടത്തല്ലിൽ ഏർപ്പെടുന്നതാണ്​ ലോകം കണ്ടത്​. കളിക്കാർക്കൊപ്പം ഇരു ഭാഗത്തുമുള്ള കോച്ചിങ്​ സ്​റ്റാഫും ചേർന്നതോടെ അത്​ പൊരിഞ്ഞതല്ലായി മാറി. പിടിച്ചുമാറ്റുന്നതിന്​ പകരം എരിതീയിലേക്ക്​ എണ്ണ പകരാനാണ്​ എല്ലാവരും ​ശ്രമിച്ചത്​. അർജൻറീന ബെഞ്ചിന്​ നേരെ തെറിവിളിച്ചെന്ന്​ കാണിച്ച്​​ ഫ്രഞ്ച്​ താരം എൻസോ മില്ലോറ്റിന്​ റഫറി റെഡ്​ കാർഡും നൽകി. മില്ലോറ്റാണ്​ സംഘർഷത്തിന്​ മരുന്നിട്ടതെന്നാണ്​ അർജൻറീന താരങ്ങളുടെ വാദം. എന്നാൽ അർജൻറീന താരങ്ങൾ ഞങ്ങളുടെ ആഘോഷം നശിപ്പിക്കാനാണ്​ നോക്കിയതെന്നും അവരുടെ ആ ചെയ്​തി ഞങ്ങളുടെ ആഘോഷം വലുതാക്കിയെന്നുമാണ്​ നിർണായക ഗോൾ നേടിയ മറ്റേറ്റ പ്രതികരിച്ചത്​.

അർജൻറീനയും ഫ്രാൻസും തമ്മിലുള്ള വൈരത്തിന്​ വലിയ ചരിത്രമൊന്നുമില്ല. രണ്ട്​ രാജ്യങ്ങളും ജിയോ പൊളിറ്റിക്കലായോ രാഷ്​ട്രീയ കാരണങ്ങളോലോ എതിർ ചേരിയിൽ നിൽക്കുന്നവരല്ല. കോളനിവൽക്കരണത്തി​െൻറയോ അധിനിവേശത്തി​െൻറയോ ചരിത്രം പേറുന്നുമില്ല. പക്ഷേ 2022 ഖത്തർ ലോകകപ്പ്​ ഫൈനൽ എല്ലാം മാറ്റിമറിച്ചു. മാരിവില്ലി​െൻറ മനോഹാരിതയുമായി ലയണൽമെസ്സിയുടെ സംഘവും കൊടുങ്കാറ്റി​െൻറ കരുത്തുമായി കിലിയൻ എംബാപ്പെയുടെ നീലപ്പടയും ഏറ്റുമുട്ടിയപ്പോൾ കാൽപന്ത്​ ലോകത്തിന്​ ലഭിച്ചത്​ അവിസ്​മരണീയ മത്സരം. പക്ഷേ ആ മത്സ​​രത്തി​െൻറ അനുരണനങ്ങൾ അവിടെയും തീർന്നില്ല. സ്വന്തം നാട്ടിലെത്തിയ അർജൻറീന ടീമി​െൻറ ആഘോഷങ്ങളും എംബാപ്പെയുടെ പാവ വെച്ചുള്ള കോപ്രായങ്ങളും ഫ്രഞ്ചുകാരെ ക്ഷുഭിതരാക്കി.

അപ്പുറത്ത്​ ഫ്രഞ്ചുകാരും വെറുതെയിരുന്നില്ല. ലാറ്റിന അമേരിക്കൻ ഫുട്​ബോൾ യൂറോപ്പിനോളം വളർന്നിട്ടില്ലെന്ന കിലിയൻ എംബാപ്പെയുടെ പ്രസ്​താവന വലിയ രോഷമുണ്ടാക്കി. ലൗത്താരോ മാർട്ടിനസ്​ അടക്കമുള്ള പല അർജൻറീന താരങ്ങളും ഇതിനെതിരെ ആഞ്ഞടിച്ചു. ലോകകപ്പിനേക്കാൾ കടുപ്പമാണ്​ യൂറോ ​കപ്പെന്ന എംബാപ്പെയുടെ പ്രസ്​താവനക്കെതിരെ സാക്ഷാൽ മെസ്സിയടക്കം രംഗത്തെത്തുകയും ചെയ്​തു. അന്താരാഷ്​ട്ര മത്സരങ്ങൾ വിട്ട് വിവാദങ്ങൾ ​ ക്ലബ്​ ഫുട്​ബോളിലേക്ക്​ പടരുന്നതും ലോകം കണ്ടു. യുറോപ്പ കോൺഫറൻസ്​ ലീഗിൽ ആസ്​റ്റൺ വില്ലയുടെ കാവൽക്കാരനായി എമിലിയാനോ മാർട്ടിനസ്​ ഫ്രാൻസിലെത്തിയപ്പോൾ കാണികൾ വലിയ പ്രതിഷേധമാണുയർത്തിയത്​. ലില്ലെയും ആസ്​റ്റൺ വില്ലയും തമ്മിൽ ഷൂട്ടൗട്ടിലേക്ക്​ നീണ്ട മത്സരത്തിൽ എമി മാർട്ടിനസും ഫ്രഞ്ച്​ കാണികളും തമ്മിൽ പലതവണ കോർത്തു.

എന്നാൽ ഈ വർഷം കോപ്പ അമേരിക്ക ഫൈനലിന്​ ​ശേഷം അർജൻറീന താരങ്ങൾ ഫ്രഞ്ച്​ താരങ്ങൾക്കെതിരെ തുപ്പിയ വംശീയ വിദ്വേഷം സകലമര്യാദകളും ലംഘിക്കുന്നതായിരുന്നു. "കേൾക്കൂ, ലോകമെമ്പാടും പ്രചരിപ്പിക്കൂ.. അവരെല്ലാം അങ്കോളയിൽ നിന്നുള്ളവരാണ്. അവർ ട്രാൻസ്ജൻഡറുകൾക്ക് ഒപ്പം അന്തിയുറങ്ങും. അവരുടെ അമ്മ നൈജീരിയക്കാരിയാണ്​, അച്ഛൻ കാമറൂൺകാരനും. പക്ഷേ പാസ്പോർട്ടിൽ പറയുന്നു അവർ ഫ്രഞ്ചുകാർ ആണെന്ന്" -എന്ന്​ തുടങ്ങുന്ന വംശീയ വരികൾ ഫുട്​ബോൾ ലോകത്തെ പിടിച്ചുകുലുക്കി.

വിഡിയോയിൽ പ്രത്യക്ഷ​പ്പെട്ട എൻസോ ഫെർണാണ്ടസിനെതിരെ താരത്തി​െൻറ ക്ലബായ ചെൽസിയും ടീമിലെ സഹതാരങ്ങളും വരെ രംഗത്തെതി. ഫ്രഞ്ച്​ ഫുട്​ബോൾ അസോസിയേഷൻ ഫിഫക്ക്​ ഔദ്യോഗിക പരാതി നൽകി. കോപ്പ അമേരിക്കയിൽ ഭാഗംപോലുമാകാത്ത ഫ്രാൻസിനെതിരെയുള്ള മുദ്രാവാക്യങ്ങൾ അർജൻറീന ഫ്രാൻസിനെ എത്രമാത്രം വെറുക്കുന്നു എന്നതിനുള്ള തെളിവായാണ്​ പലരും ഉയർത്തിക്കാട്ടിയത്​. എന്നാൽ 2018ലെ റഷ്യൻ ലോകകപ്പിൽ അർജൻറീനയെ പരാജയപ്പെടുത്തിയതിന്​ പിന്നാലെ ഫ്രഞ്ച്​ താരങ്ങൾ മെസ്സിയെ പരിഹസിക്കുന്ന വരികൾ ചൊല്ലിയപ്പോൾ ഇപ്പോൾ പ്രതിഷേധിക്കുന്നവരെയൊന്നും കണ്ടില്ലെന്നാണ്​ അർജൻറീന ആരാധകർ മറുവാദമുയർത്തിയത്​.

പാരിസ്​ ഒളിമ്പിക്​സിൽ അർജൻറീന ഫ്രാൻസ്​ പോര്​ പുതിയ ഉയരങ്ങളിലെത്തുന്നതാണ്​ കണ്ടത്​. ഫുട്​ബോളും കടന്ന്​ റഗ്​ബിയിലേക്കും ഹാൻഡ്​ ബോളിലേക്കുമെല്ലാം വൈരം വ്യാപിച്ചു. ഈ മത്സരങ്ങളിലെല്ലാം അർജൻറീന ദേശീയ ഗാനം മുഴങ്ങിയപ്പോൾ സ്​റ്റേഡിയങ്ങൾ കൂവലുകളിൽ മുങ്ങി​. ലയണൽ ​മെസ്സിയിൽ നിന്നേറ്റ വേദന​യാലാണ്​​ ഫ്രഞ്ചുകാർ ഞങ്ങൾക്കെതിരെ കൂവുന്നതെന്നാണ്​ അർജൻറീന റഗ്​ബി താരം മാർക്കോസ്​ മൊനേറ്റ പ്രതികരിച്ചത്​. വൈരം കലാപമാകാതിരിക്കാൻ ഒളിമ്പിക്​സ്​ അധികൃതർ വലിയ സുരക്ഷയാണ്​ ഒരുക്കുന്നത്​. ക്വാർട്ടർ ഫൈനലിന്​ പിന്നാലെ സംഘർഷം ഉടലെടുത്തപ്പോൾ സുരക്ഷ വലയം തീർത്താണ് അർജൻറീന ആരാധകരെ ​ പൊലീസ്​ സംരക്ഷിച്ചത്​.