‘കസാഖിസ്​ഥാനിലെ വിമാനാപകടത്തിന്​ പിന്നിൽ ബാഹ്യഇടപെടൽ’; റിപ്പോർട്ടുമായി അസർബൈജാൻ എയർലൈൻസ്​

ബാകു: കഴിഞ്ഞദിവസം കസാഖിസ്​ഥാനിൽ വിമാനം തകർന്നുവീണ സംഭവത്തിൽ ബാഹ്യഇടപെടലുണ്ടെന്ന്​ അസർബൈജാൻ എയർലൈൻസി​െൻറ പ്രാഥമികാന്വേഷണ റിപ്പോർട്ട്​. ഭൗതികവും സാ​ങ്കേതികവുമായ ഇടപെടലുണ്ടായിട്ടുണ്ടെന്നാണ്​ അന്വേഷണത്തിൽ മനസ്സിലായിട്ടുള്ളത്​.

ക്രിസ്​മസ്​ ദിനത്തിലുണ്ടായ അപകടത്തിൽ 38 യാത്രക്കാരാണ്​ മരിച്ചത്​. വിമാനത്തിൽ 67 പേരുണ്ടായിരുന്നു. 29 പേ​ർ പരിക്കുകളോടെ ചികിത്സയിലാണ്​. അസർബൈജാൻ എയർലൈൻസി​െൻറ ജെ28243 എംബ്രയർ 190 വിമാനമാണ്​ അപകടത്തിൽപെട്ടത്​.

അസർബൈജാ​െൻറ തലസ്​ഥാനമായ ബാകുവിൽനിന്ന്​ റഷ്യയിലെ ചെച്​നിയയിലുള്ള ഗ്രോസ്​നിയിലേക്ക്​ പോവുകയായിരുന്നു വിമാനം. മൂടൽമഞ്ഞ്​ കാരണം ഗ്രോസ്​നിയിൽ ഇറങ്ങാൻ അനുമതി നിഷേധിക്കുകയും കാസ്​പിയൻ കടലി​െൻറ ഭാഗത്തേക്ക്​ തിരിച്ചുവിടുകയും ചെയ്​തു. തുടർന്ന്​ കസാഖിസ്​ഥാനിലെ അകാതു നഗരത്തിന്​ സമീപം കടലിനോട്​ ചേർന്ന്​ തകർന്നുവീഴുകയായിരുന്നു.

റഷ്യയുടെ മിസൈൽ പതിച്ചാണ്​ അപകടമുണ്ടായതെന്ന റിപ്പോർട്ടുകൾ അടുത്തദിവസം തന്നെ പുറത്തുവന്നിരുന്നു. എന്നാൽ, ഈ വാദം റഷ്യ നിഷേധിക്കുകയും ഇത്തരം പ്രചാരണങ്ങൾക്കെതിരെ മുന്നറിയിപ്പ്​ നൽകുകയും ചെയ്​തു. ഇതുസംബന്ധിച്ച അന്വേഷണം ഇപ്പോഴും തുടരുകയാണ്​.

അതേസമയം, റഷ്യയുടെ​ ‘പാൻറ്​സിർ എസ്​ എയർ’ വ്യോമ പ്രതിരോധ സംവിധാനമാണ്​ വിമാനത്തെ തകർത്തതെന്ന്​ അസർബൈജാൻ സർക്കാർ അനുകൂല വെബ്​സൈറ്റായ ‘കാലിബർ’ ഔദ്യോഗിക വൃത്തങ്ങളെ ഉദ്ധരിച്ചുകൊണ്ട് റിപ്പോർട്ട്​ ചെയ്യുന്നുണ്ട്​. വിമാനത്തി​െൻറ മുൻവശത്ത്​ ദ്വാരം വീണിട്ടുണ്ട്​. ഇത്​ മിസൈലി​െൻറ ഷാർപ്പ്​നെൽ പതിച്ചാണെന്നാണ്​ റിപ്പോർട്ട്​.

വിമാനം പറന്ന റഷ്യയിലെ ഗ്രോസ്​നി നഗരം യുക്രെയ്​ൻ ഡ്രോണുകളുടെ പ്രധാന ലക്ഷ്യസ്​ഥാനമാണ്​. അതിനാൽ തന്നെ ഇവയെ പ്രതിരോധിക്കാൻ കനത്ത വ്യോമ പ്രതിരോധ സംവിധാനങ്ങളാണ്​ റഷ്യ വിന്യസിച്ചിട്ടുള്ളത്​. അബദ്ധത്തിൽ ഇതിൽനിന്നുള്ള മിസൈൽ പതിക്കുകയായിരുന്നുവെന്നാണ്​ ആക്ഷേപം.

ഓൺലൈൻ ​ഫ്ലൈറ്റ്​ ട്രാക്കിങ്​ വെബ്​സൈറ്റായ ‘ഫ്ലൈറ്റ്​ റഡാർ 24’ പറയുന്നത്​ വിമാനത്തി​െൻറ ജിപിഎസ്​ ജാമായിരുന്നുവെന്നാണ്​. പക്ഷെ, ഇതി​െൻറ കാരണം എന്താണെന്ന് അവർ​ പറയുന്നില്ല. ഒരു മണിക്കൂറോളം ഉയരം നിലനിർത്താൻ വിമാനം പാടുപെടുന്നുണ്ടായിരുന്നു. തുടർന്ന്​ പെ​ട്ടെന്ന്​ താഴേക്ക്​ വരികയും പിന്നീട്​ നിലത്തേക്ക്​ ഇടിച്ചിറക്കുന്നതി​െൻറയും ​ദൃശ്യങ്ങൾ സാമൂഹിക മാധ്യമങ്ങളിൽ പ്രചരിക്കുന്നുണ്ട്​. സുരക്ഷ മുൻനിർത്തി റഷ്യയിലേക്കുള്ള നിരവധി വിമാനങ്ങൾ റദ്ദാക്കിയതായി അസർബൈജാൻ എയർ​ലൈൻസ്​ വെള്ളിയാഴ്​ച പ്രഖ്യാപിച്ചിട്ടുണ്ട്​.

‘ജീവിതത്തി​െൻറ അവസാനത്തിനായി ഞാൻ ഒരുങ്ങി’

ഗ്രോസ്​നി എത്താൻ സമയത്ത്​ വലിയൊരു ശബ്​ദമുണ്ടായതായി ഒരു യാത്രക്കാരൻ റോയി​ട്ടേഴ്​സിനോട്​ പറയുന്നു. ‘വിമാനം തകരാൻ പോവുകയാണെന്ന്​ ഞാൻ കരുതി. ഇതോടെ പ്രാർഥിക്കാനും ജീവിതാവസാനത്തിനായുള്ള ഒരുക്കവും തുടങ്ങി’ -ആശുപത്രിയിൽ ചികിത്സയിലുള്ള യാത്രക്കാരനായ സുഭോൻകുൽ രാഖിമോവ്​ പറഞ്ഞു. വലിയ ശബ്​ദം കേട്ടശേഷം മദ്യപിച്ചതുപോലെയുള്ള പെരുമാറ്റമായിരുന്നു വിമാനത്തിനെന്നും അദ്ദേഹം കൂട്ടിച്ചേർത്തു.

റഷ്യൻ വ്യോമ പ്രതിരോധ സംവിധാനം അബദ്ധത്തിൽ വെടിവിച്ചിട്ടതാണെന്ന്​ നാല്​ സ്രോതസ്സുകളെ ഉദ്ധരിച്ചുകൊണ്ട്​ റോയി​ട്ടേഴ്​സ്​ റിപ്പോർട്ട്​ ചെയ്യുന്നുണ്ട്​. എന്നാൽ, അന്വേഷണം പുരോഗമിക്കുകയാണെന്നാണ്​ റഷ്യ പറയുന്നത്​.

വിമാനത്തിന്​ ലാൻഡ്​ ചെയ്യാനായി മറ്റു എയർപോർട്ടുകൾ നിർദേശിച്ചെങ്കിലും ക്യാപ്​റ്റൻ കസാഖിസ്​ഥാനിലെ അകാതു തെരഞ്ഞെടുക്കുകയായിരുന്നുവെന്ന്​ റഷ്യൻ വ്യോമയാന മേഖലയിലെ നിരീക്ഷകരായ റോസാവിയാറ്റ്​സിയ പറയുന്നു.

മലേഷ്യൻ എയർലൈൻസി​െൻറ എംഎച്ച്​ 17​െൻറ തകർച്ചക്ക്​ സമാനമാണ്​ ഇപ്പോൾ അസർബൈജാൻ എയർ​ലൈൻസിനും സംഭവിച്ചിരിക്കുന്നത്​. ആംസ്റ്റർഡാമിൽനിന്ന് ക്വാലാലംപൂരിലേക്ക്​ 2014 ജൂലൈ 17ന് കിഴക്കൻ ഉക്രെയ്‌നിന് മുകളിലൂടെ പറക്കുന്നതിനിടെ റഷ്യൻ പിന്തുണയുള്ള സേന ‘Buk 9M38’ ഉപരിതല മിസൈൽ ഉപയോഗിച്ച് വെടിവച്ചുവീഴ്ത്തുകയായിരുന്നു. സംഭവത്തിൽ 283 യാത്രക്കാരും 15 ജീവനക്കാരുമാണ്​ മരിച്ചത്​.