അൽ തബീൻ സ്കൂളിലെ കൂട്ടക്കൊല: ഹമാസ്​ പോരാളികളെ ലക്ഷ്യമിട്ടാണ്​ ആക്രമണമെന്ന ഇസ്രായേൽ വാദം പൊളിയുന്നു

ദുബൈ: ഗസ്സ സിറ്റിയിൽ അഭയാർഥികൾ താമസിച്ച അൽ തബീൻ സ്​കൂളിന്​ നേരെ ആക്രമണം നടത്തി നൂറിലേറെ പേരെ കൊലപ്പെടുത്തിയ ഇസ്രായേലിനെതിരെ ലോകവ്യാപക പ്രതിഷേധം. ഹമാസ്​ പോരാളികളെ ലക്ഷ്യം വെച്ചാണ്​ ആക്രമണം നടത്തിയതെന്ന ഇസ്രായേൽ വാദം പൊളിയുന്നു.

എല്ലാ അന്താരാഷ്​ട്ര നിയമങ്ങളുടെയും നഗ്​നമായ ലംഘനമാണ്​ ഗസ്സയിൽ തുടരുന്നതെന്ന്​ അറബ്​ ലീഗ്​, ഒ.ഐ.സി, ജി.സി.സി കൂട്ടായ്​മകൾ കുറ്റ​പ്പെടുത്തി. വെടിനിർത്തൽ ചർച്ചകൾ അട്ടിമറിക്കാനുള്ള ആസൂത്രിത നീക്കമാണിതെന്നും അറബ്​ ലീഗ്​ ആരോപിച്ചു.

അമേരിക്കയും യൂറോപ്യൻ രാജ്യങ്ങളും കുരുതിയെ അപലപിച്ചു. എന്നാൽ, സ്​കൂളിൽ തമ്പടിച്ച പോരാളികളെ ലക്ഷ്യം വെച്ചാണ്​ ആക്രമണം നടത്തിയതെന്ന്​ ഇസ്രായേൽ അറിയിച്ചതായി അമേരിക്കയും ബ്രിട്ടനും പ്രതികരിച്ചു. സംഭവത്തെ കുറിച്ച്​ കൂടുതൽ അന്വേഷിക്കുമെന്നും അമേരിക്ക അറിയിച്ചു.

കൊല്ലപ്പെട്ടവരിൽ ഒരു പോരാളി പോലും ഇ​ല്ലെന്നിരിക്കെ, വംശഹത്യയെ മറച്ചുപിടിക്കാനുള്ള പ്രചാരണമാണ്​ ഇസ്രായേൽ നടത്തുന്നതെന്ന്​ ഹമാസ്​ വ്യക്​തമാക്കി. ഒരാഴ്​ചക്കിടെ അഭയാർഥികൾ താമസിച്ചുവരുന്ന അഞ്ച് സ്​കൂളുകൾക്ക്​ നേരെയാണ്​ ഇസ്രായേൽ ആക്രമണം നടത്തിയത്​. സംഭവത്തെക്കുറിച്ച്​ ചർച്ച ചെയ്യാൻ അടിയന്തര യു.എൻ രക്ഷാ സമിതി വിളിച്ചുചേർക്കണമെന്ന്​ അൾജീരിയ ആവശ്യപ്പെട്ടു.

ഗസ്സയിലേക്ക്​ അന്താരാഷ്​ട്ര സംഘത്തെ അയക്കണമെന്ന ആവശ്യവും ശക്​തമാണ്​. വെടിനിർത്തൽ കരാർ ചർച്ച അട്ടിമറിക്കാൻ നെതന്യാഹു നീക്കം നടത്തുന്നതായി ആരോപിച്ച്​ ആയിരങ്ങൾ ​തെൽഅവീവിൽ പ്രതിഷേധിച്ചു. ബന്ദികളെ ജീവനോടെ മോചിപ്പിക്കാനുള്ള അവസാന സന്ദർഭമാണിതെന്ന്​ ബന്​ധുക്കൾ പറഞ്ഞു. വെടിനിർത്തൽ കരാർ രൂപപ്പെടുത്താൻ ഇരു വിഭാഗത്തെയും ​പ്രേരിപ്പിച്ചു വരികയാണെന്ന്​ അമേരിക്ക, ഖത്തർ, ഈജിപ്​ത്​ എന്നീ രാജ്യങ്ങൾ അറിയിച്ചു. ഹമാസിന്റെ ഔദ്യോഗിക പ്രതികരണം വന്നിട്ടില്ല.

അതിനിടെ ലബനാൻ, ഇസ്രായേൽ അതിർത്തിയിൽ സംഘർഷം വ്യാപിക്കുകയാണ്​. ഇസ്രായേൽ ​സൈനിക കേന്ദ്രങ്ങൾക്ക്​ നേരെ നിരവധി മിസൈലുകൾ അയച്ചതായി ഹിസ്​ബുല്ല അറിയിച്ചു. ഇതിനെ തുടർന്ന്​ ദക്ഷിണ ലബനാനു നേർക്ക്​ ഇസ്രായേൽ വ്യോമാക്രമണം ശക്​തമാക്കി. ഇസ്രായേലിനു നേരെ ഇറാനും ഹിസ്​ബുല്ലയും നടത്തുമെന്ന്​ പ്രഖ്യാപിച്ച പ്രത്യാക്രമണം ആസന്നമാണെന്ന്​ ഇസ്രായേൽ മാധ്യമങ്ങൾ റിപ്പോർട്ട്​ ചെയ്​തു. ആക്രമണം ഉണ്ടായാൽ സ്വീകരിക്കേണ്ട സൈനിക നടപടികളെ കുറിച്ച്​ അമേരിക്കയുമായി ചേർന്ന്​ ഇസ്രായേൽ തിരക്കിട്ട ചർച്ച തുടരുകയാണ്​.