വ്യത്യസ്​ത രൂപം, പിന്നിലും വെൻറിലേറ്റഡ്​ സീറ്റുകൾ; ഗെയിം ചെയ്​ഞ്ചറാകാൻ കിയ സിറോസ്​

ഇന്ത്യയിൽ നിലവിൽ ഏറ്റവും ജനപ്രിയമായ സെഗ്​മെൻറാണ്​ കോംപാക്​ട്​ എസ്​യുവി. ഇവിടേക്കാണ്​ ദക്ഷിണ കൊറിയൻ കമ്പനിയായ കിയ തങ്ങളുടെ പുതിയ വാഹനമായ സിറോസിനെ കഴിഞ്ഞദിവസം അവതരിപ്പിച്ചിട്ടുള്ളത്​. ഫീച്ചറുകളിലും പ്രായോഗികതയിലും എതിരാളികളെ നിഷ്​പ്രഭമാക്കും വിധമാണ്​ സിറോസിനെ കിയ അണിയിച്ചൊരുക്കിയിട്ടുള്ളത്​. സോണറ്റിനും സെൽറ്റോസിനും ഇടയിലാണ്​ ഈ നാല്​ മീറ്ററിന്​ താഴെയുള്ള എസ്​യുവിയുടെ സ്​ഥാനം. വാഹനത്തി​െൻറ ബുക്കിങ്​ ജനുവരി മൂന്നിന്​​ ആരംഭിക്കും. ഫെബ്രുവരി ആദ്യം വിൽപ്പന തുടങ്ങും.

ഏറെ വ്യത്യസ്​തമായ ബോക്​സി ഡിസൈനാണ്​ സിറോസിന്​ നൽകിയിട്ടുള്ളത്​. മുമ്പ്​ സ്​കോഡ ഇന്ത്യയിൽ വിറ്റിരുന്ന ‘യെതി’യുടെ രൂപവുമായി ചെറിയ സാദൃശ്യമുണ്ട്​. ​ലംബമായി അടുക്കിയിരിക്കുന്ന ഹെഡ്​ലാംപുകളും എൽ ആകൃതിയിലുള്ള ടെയിൽ ലൈറ്റുമെല്ലാം വാഹനത്തി​ന്​ വ്യത്യസ്​തത സമ്മാനിക്കുന്നു. 2550 എംഎം ആണ്​ വീൽബേസ്​​. ഇത്​ ഉള്ളിൽ കൂടുതൽ വിശാലത നൽകുന്നുവെന്ന്​ കിയ അവകാശപ്പെടുന്നു.

രണ്ട്​ എൻജിൻ ഒപ്​ഷനുകളാണ്​ കിയ വാഗ്​ദാനം ചെയ്യുന്നത്​. 1 ലിറ്റർ ടർബോ പെട്രോൾ എൻജിൻ 120 എച്ച്​പിയും 172 എൻഎം ടോർക്കും നൽകുന്നു. 6 സ്​പീഡ്​ മാനുവൽ, 7 സ്​പീഡ്​ ഡിസിടി ഗിയർബോക്​സുകൾ ഇതിൽ ലഭ്യമാണ്​. 1.5 ലിറ്റർ ഡീസൽ എൻജിൻ 116 എച്ച്​പിയും 250 എൻഎം ടോർക്കും ഉൽപ്പാദിപ്പിക്കും. 6 സ്​പീഡ്​ മാനുവൽ, 6 സ്​പീഡ്​ ടോർക്ക്​ കൺവെർട്ടർ ഓ​ട്ടോമാറ്റിക്​ ഗിയർ ബോക്​സുകൾ ഇതുമായി ഉൾചേർത്തിരിക്കുന്നു. നാല്​ വേരിയൻറുകളിൽ വാഹനം ലഭ്യമാകും. സിറോസി​െൻറ വില കിയ ഇതുവരെ ​പ്രഖ്യാപിച്ചിട്ടില്ല. 

എതിരാളികളെ വെല്ലുന്ന ഫീച്ചറുകൾ

ഹ്യുണ്ടായ്​ വെന്യു, ടാറ്റ നെക്​സോൺ, മഹീന്ദ്ര എക്​സ്​യുവി 3XO, മാരുതി ബ്രെസ്സ, വരാനിരിക്കുന്ന സ്​കോഡ കൈലാഖ്​ എന്നിവയാകും പ്രധാന എതിരാളികൾ. എന്നാൽ, ഈ വാഹനങ്ങളുടേതിന്​ വ്യത്യസ്​തമായി പ്രീമിയം ഫീച്ചറുകളാണ്​ സിറോസിലുള്ളത്​. അതിനാൽ തന്നെ ഇതിനൊപ്പം പിടിച്ചുനിൽക്കാൻ എതിരാളികൾ അൽപ്പം വിയർക്കുമെന്നാണ്​ വാഹന വിദഗ്​ധർ ചൂണ്ടിക്കാട്ടുന്നത്​.

സിറോസിലെ 30 ഇഞ്ച്​ ട്രിനിറ്റി​ പനോരമിക്​ ഡിസ്​​േപ്ല ആരെയും അതിശയിപ്പിക്കുന്നതാണ്​. ഈ സെഗ്​മെൻറിലെ ഏറ്റവും വലിയ ഡിസ്​​േപ്ലയാണിത്​. ഇതിൽ 12.3 ഇഞ്ചി​െൻറ രണ്ട്​ സ്​ക്രീനുകൾ വീതമുണ്ട്​. ഒന്ന്​ ഇ​ൻഫോടൈൻമെൻറ്​ സംവിധാനവും മറ്റൊന്ന്​ ഡ്രൈവർക്കുള്ള ഇൻസ്​ട്രുമെൻറ്​ ക്ലസ്​റ്ററുമാണ്​. ഇതിന്​ പുറമെ ക്ലൈമറ്റ്​ കൺട്രോളിനായി അഞ്ച്​ ഇഞ്ചി​െൻറ ടച്ച്​ പാനലും ഉൾപ്പെടുത്തിയിട്ടുണ്ട്​. ഇത്​ കൂടാതെ സെൻട്രൽ കൺസോളിൽ ഫിസിക്കൽ ബട്ടണുകളും നൽകിയിരിക്കുന്നു.

ഡ്രൈവർ സീറ്റിൽ വെൻറിലേറ്റഡ്​ സീറ്റുകൾ ഇന്ന്​​ പല വാഹനങ്ങളിലും പതിവാണ്​. എന്നാൽ, പിന്നിലെ സീറ്റിൽ ഇത്​ പ്രീമിയം ലക്ഷ്വറി വാഹനങ്ങളിലാണ്​ കൂടുതൽ കാണാറ്​. ഈയൊരു ഫീച്ചർ സിറോസിലും കിയ നൽകിയിരിക്കുകയാണ്​. ഡോർ ഹാൻഡിലിലാണ്​ ഇതി​െൻറ ബട്ടൺ നൽകിയിട്ടുള്ളത്​. അതിനാൽ തന്നെ ഉപയോഗിക്കാനും ഏറെ എളുപ്പമാണ്​.

പിൻസീറ്റിലെ കിയയുടെ മാന്ത്രികവിദ്യകൾ വെൻറിലേറ്റഡ്​ സീറ്റിൽ അവസാനിക്കുന്നില്ല. യാത്രക്കാര​െൻറ ആവശ്യത്തിന്​ അനുസരിച്ച്​ ചരിക്കാനും നീക്കാനും കഴിയുന്ന പിൻസീറ്റാണ്​ സിറോസിലുള്ളത്​. ഇതും മറ്റു വാഹനങ്ങളിൽ സാധാരണയായി കാണാത്തതാണ്​. ഇന്ത്യയിൽ തന്നെ എസ്​യുവി വിഭാഗത്തിൽ ആദ്യമായിട്ടാണ്​ ഈ ഫീച്ചർ ലഭ്യമാകുന്നത്​​. ഇതുവഴി യാത്രക്കാർക്ക്​ കൂടുതൽ ലെഗ്​ സ്​പേസ്​ വർധിപ്പിക്കാനാകും. ആവശ്യ​മെങ്കിൽ ബൂട്ട്​ സ്​പേസും കൂടുതൽ ലഭിക്കും. അതുപോലെ 60:40 രീതിയിൽ സീറ്റുകൾ മടക്കാനും സാധിക്കും. 465 ലിറ്ററാണ്​ സിറോസി​െൻറ​ ബൂട്ട്​ സ്​പേസ്​.

ആറ്​ പാർക്കിങ്​ സെൻസറുകളും വാഹനത്തെ അടുത്തതലത്തിലേക്ക്​​ എത്തിക്കുന്നു. മുന്നിലും പിന്നിലുമുള്ള സെൻസറുകൾക്ക്​ പുറമെ മുന്നിലെ വീൽ ആർച്ചുകൾക്ക്​ താഴെയായിട്ടാണ് നാല്​ സെൻസറുകൾ​ നൽകിയിട്ടുള്ളത്​. ഇത്​ പാർക്കിങ് കൂടുതൽ സുഖപ്രദമാക്കും.

വാഹനത്തി​െൻറ ബോഡിയേട്​ ചേർന്നുനിൽക്കുന്ന ഫ്ലഷ്​ ഡോർ ഹാൻഡിലാണ്​ മറ്റൊരു പ്രത്യേകത. ഈ ഫീച്ചറുള്ള ഏറ്റവും വില കുറഞ്ഞ വാഹനമാകും സിറോസ്​. 20 സുരക്ഷാ സവിശേഷതകളുള്ള ലെവൽ 2 അഡാസാണ്​ കിയ ഈ വാഹനത്തിൽ നൽകിയിട്ടുള്ളത്​. അതിനാൽ തന്നെ സുരക്ഷയിലും ഫീച്ചറിലും സെഗ്​മെൻറിലെ മറ്റു വാഹനങ്ങളേക്കാൾ സിറോസ്​ മുന്നിലാണെന്ന്​ നിസ്സംശയം പറയാം.