പ്രചര സൂപ്പര്‍ ലീഗ് ഡിസംബര്‍ 25ന് നടക്കും
അഖിലേന്ത്യാ തലത്തിലുള്ള സെവന്‍സ് ഫുട്‌ബോള്‍ ടൂര്‍ണമെന്‍റാണ് പ്രചര സൂപ്പര്‍ ലീഗ്
Update: 2022-12-16 18:30 GMT
ദുബൈ: പ്രചര ചാവക്കാട് ഒരുക്കുന്ന ഫുട്ബാൾ ടൂർണമെന്‍റ് ഡിസംബര്‍ 25ന് നടക്കും. മിര്‍ദിഫ് ഗ്രീന്‍ സോണില്‍ ഉച്ചക്ക് രണ്ടര മുതൽ ടൂർണമെന്‍റിന് തുടക്കം കുറിക്കുമെന്ന് ഭരവാഹികള്‍ വാര്‍ത്താസമ്മേളനത്തില്‍ അറിയിച്ചു. അഖിലേന്ത്യാ തലത്തിലുള്ള സെവന്‍സ് ഫുട്‌ബോള്‍ ടൂര്‍ണമെന്‍റാണിത്.
16 ഇന്ത്യന്‍ ടീമുകളാണ് നോക്കൗട്ട് അടിസ്ഥാനത്തിലുള്ള മല്‍സരത്തില്‍ പങ്കെടുക്കുക. 1, 2, 3 സ്ഥാനക്കാര്‍ക്ക് ട്രോഫികളും കാഷ് പ്രൈസുകളും മറ്റു സമ്മാനങ്ങളും നല്‍കും. ഫുട്‌ബോളിലെ പ്രഫഷനലുകള്‍ ഏറ്റുമുട്ടുന്ന മികച്ച ടൂര്‍ണമെന്‍റായിരിക്കും ഇത്. കേവലം ഫുട്‌ബോള്‍ മല്‍സരത്തിനപ്പുറം ഒരുദിവസം പൂർണമായും നീണ്ടുനില്‍ക്കുന്ന കുടുംബ വിനോദ പരിപാടികളും ഇതിന്‍റെ ഭാഗമായി ഒരുക്കിയിട്ടുണ്ട്. പ്രവേശനം സൗജന്യമാണ്.
തൃശ്ശൂര്‍ ജില്ലയിലെ ചാവക്കാട് പ്രദേശത്ത് നിന്നുള്ളവരുടെ കൂട്ടായ്മയാണ് 'പ്രചര ചാവക്കാട്'. മൂന്നു പതിറ്റാണ്ടായി ജീവകാരുണ്യ രംഗത്തും മറ്റും സംഘടന സജീവമാണ്. പ്രചരചാവക്കാട് പ്രസിഡന്‍റ് ഷാജി എം.അലി, പ്രോഗ്രാം കണ്‍വീനര്‍ അഭിരാജ് പൊന്നാരശ്ശേരി, ട്രഷറര്‍ ഫാറൂഖ് തെക്കത്ത്, ഉപദേശക സമിതിയംഗങ്ങളായ മുബാറക് ഇംബാറക്ക്, മണി കോച്ചന്‍, അബൂബക്കര്‍, സാദിഖ്, ഷാഹുല്‍ തെക്കത്ത് എന്നിവര്‍ വാര്‍ത്താസമ്മേളനത്തില്‍ സംബന്ധിച്ചു.