ഡൽഹിയിൽ ഫലസ്തീൻ അനുകൂല പ്രകടനം നടത്തിയ ഐസ പ്രവർത്തകരെ പോലീസ് കസ്റ്റഡിയിലെടുത്തു
ഇസ്രായേൽ അനുകൂല നിലപാടാണ് പൊലീസിനെന്ന് ഐസ പ്രവർത്തകർ ആരോപിച്ചു
Update: 2023-10-16 16:06 GMT
ഡൽഹി: ജന്തർ മന്ദറിൽ ഫലസ്തീൻ അനുകൂല പ്രകടനം തടഞ്ഞ് ഡൽഹി പോലീസ്. പ്രകടനം നടത്തിയ ഐസ പ്രവർത്തകരെ പോലീസ് കസ്റ്റഡിയിലെടുത്തു. ജന്തർ മന്ദറിലെ പ്രധാന സമരവേദിയിൽ പ്രവേശിക്കുന്നതിന് മുമ്പ് തന്നെ പൊലീസ് ഐസ പ്രവർത്തകരെ കസ്റ്റഡിയിലെടുക്കുകയായിരുന്നു.
ഇത്തരത്തിലൊരു പ്രകടനത്തിന് അനുമതിയുണ്ടായിരുന്നില്ല. അനുമതി നിഷേധിച്ച സാഹചര്യത്തിൽ നിയമം ലംഘിച്ചുകൊണ്ടാണ് പ്രവർത്തകർ പ്രതിഷേധിച്ചതെന്ന് പൊലീസ് പറഞ്ഞു. ഇസ്രായേൽ അനുകൂല നിലപാടാണ് പൊലീസിനെന്ന് ഐസ പ്രവർത്തകർ ആരോപിച്ചു. കസ്റ്റഡിയിലെടുത്ത പ്രവർത്തകരെ ഡൽഹിയുടെ അതിർത്തിയിലുള്ള വിവിധ പൊലീസ് സ്റ്റേഷനുകളിലേക്ക് മാറ്റി.