പാർലമെന്റ് ശീതകാല സമ്മേളനത്തിൽ വഖഫ് ഭേദഗതിയും; 15 ബില്ലുകൾ പട്ടികയിൽ
വഖഫ് നിയമഭേദഗതിയും അഞ്ച് പുതിയ ബില്ലുകളും ഉൾപ്പെടെ 15 ബില്ലുകളാണ് പാർലമെന്റിൽ അവതരിപ്പിക്കാൻ സർക്കാർ പട്ടികപ്പെടുത്തിയിരിക്കുന്നത്
Update: 2024-11-21 16:23 GMT
ഡൽഹി: പാർലമെൻ്റിൻ്റെ ശീതകാല സമ്മേളനത്തിൽ വഖഫ് നിയമ ഭേദഗതി ബിൽ ഉൾപ്പെടെ കേന്ദ്ര സർക്കാറിന്റെ പരിഗണനയിൽ. വഖഫ് നിയമഭേദഗതിയും അഞ്ച് പുതിയ ബില്ലുകളും ഉൾപ്പെടെ 15 ബില്ലുകളാണ് പാർലമെന്റിൽ അവതരിപ്പിക്കാൻ സർക്കാർ പട്ടികപ്പെടുത്തിയിരിക്കുന്നത്. നവംബർ 25 തിങ്കളാഴ്‌ചയാണ് ശീതകാല സമ്മേളനം ആരംഭിക്കുക.
അഞ്ച് പുതിയ കരട് നിയമനിർമാണങ്ങളിൽ ഒരു സഹകരണ സർവകലാശാല സ്ഥാപിക്കുന്നതിനുള്ള നിയമവും ഉൾപ്പെടുത്തിയിട്ടുണ്ട്. മുസ്‌ലിം സമുദായം ഏറെക്കുറെ നിയന്ത്രിക്കുന്ന ബോർഡുകളിൽ നിന്നും ട്രിബ്യൂണലുകളിൽ നിന്നും വഖഫ് ഭരിക്കാനുള്ള അധികാരം സർക്കാരുകളിലേക്ക് മാറ്റുന്നതാണ് പുതിയ ഭേദഗതി.
വഖഫ് (ഭേദഗതി) ബില്ലും മുസ്സൽമാൻ വഖഫ് (റദ്ദുചെയ്യൽ) ബില്ലും ഉൾപ്പെടെ എട്ട് ബില്ലുകളാണ് ലോക്‌സഭയിലുള്ളത്. ഇവ ഇരുസഭകളുടെയും സംയുക്ത സമിതി ലോക്‌സഭയിൽ റിപ്പോര്‍ട്ട് സമര്‍പ്പിച്ചതിന് ശേഷം പരിഗണനയ്ക്കും പാസാക്കുന്നതിനുമായി പട്ടികപ്പെടുത്തിയിട്ടുണ്ട്. ശീതകാല സമ്മേളനത്തിന്റെ ആദ്യ ആഴ്‌ചയിലെ അവസാന ദിവസം സമിതി റിപ്പോര്‍ട്ട് സമര്‍പ്പിക്കും.
2024-25 വര്‍ഷത്തെ ഗ്രാന്റുകള്‍ക്കായുള്ള സപ്ലിമെന്ററി ഡിമാന്‍ഡുകളുടെ ആദ്യ ബാച്ചിലെ അവതരണം, ചര്‍ച്ച, വോട്ടെടുപ്പ് എന്നിവയും ലിസ്റ്റ് ചെയ്‌തിട്ടുണ്ട്‌. സഭയില്‍ അവതരിപ്പിക്കുന്നതിനും പരിഗണിക്കുന്നതിനും പാസാക്കുന്നതിനുമായി സര്‍ക്കാര്‍ ലിസ്റ്റ് ചെയ്‌തിരിക്കുന്ന മറ്റൊരു ബില്ലാണ് ഡല്‍ഹി ജില്ലാ കോടതികളുടെ പണമിടപാട്. അപ്പീല്‍ അധികാരപരിധി നിലവിലുള്ള 3 ലക്ഷം രൂപയില്‍ നിന്ന് 20 ലക്ഷം രൂപയായി ഉയര്‍ത്തുന്നതിനുള്ള പഞ്ചാബ് കോടതികളുടെ (ഭേദഗതി) ബില്ലാണിത്.
കൂടാതെ, തീരദേശ ഷിപ്പിംഗ് ബില്ലും ഇന്ത്യൻ തുറമുഖ ബില്ലും അവതരിപ്പിക്കുന്നതിനും അന്തിമമായി പാസാക്കുന്നതിനുമായി പട്ടികപ്പെടുത്തിയിട്ടുണ്ട്. പാർലമെൻ്റിൻ്റെ ശീതകാല സെഷൻ ഡിസംബർ 20ന് സമാപിക്കും.