ഡ്യൂട്ടി സമയത്ത് പൊലീസ് ഉദ്യോ​ഗസ്ഥർ മൊബൈൽ ഉപയോ​ഗിക്കേണ്ട; വിലക്കി ഹരിയാന

ന്യൂഡൽഹി: ഹരിയാനയിൽ ഡ്യൂട്ടി സമയത്ത് പൊലീസുകാർ മൊബൈൽ ഉപയോ​ഗിക്കുന്നതിന് വിലക്ക്. അച്ചടക്കനടപടിയുടെ ഭാ​ഗമായാണിത്. സീനിയർ ഉദ്യോ​ഗസ്ഥരുടെ അനുമതിയുണ്ടെങ്കിൽ മാത്രമാണ് ഇനിമുതൽ ഉദ്യോ​ഗസ്ഥർക്ക് മൊബൈൽ ഉപയോ​ഗിക്കാനാവുക. എല്ലാ ജില്ലാ പൊലീസ് മേധാവിമാർക്കും ഡിജിപിയുടെ ഓഫീസ് നിർദേശം നൽകി. ഡ്യൂട്ടി സമയത്ത് മൊബൈൽ ഫോണുകളിൽ മുഴുകി ഔദ്യോഗിക കൃത്യനിർവഹണത്തിൽ പൊലീസ് ഉദ്യോ​ഗസ്ഥർ അലംഭാവം കാണിക്കുന്നതായി കണ്ടെത്തിയതിനെ തുടർന്നാണ് നിർദേശം.

ഡ്യൂട്ടി സമയത്ത് മൊബൈൽ ഫോണുകളും മറ്റു ഇലക്ട്രോണിക് ആശയവിനിമയ ഉപകരണങ്ങളും സീനിയർ ഉദ്യോഗസ്ഥർക്ക് സമർപ്പിക്കണം. അവർ എല്ലാ ഉപകരണങ്ങളുടെയും രേഖകൾ സൂക്ഷിക്കും. ഫോണുപയോ​ഗിക്കാൻ അനുമതിയുള്ള ഉദ്യോ​ഗസ്ഥരുടെ രേഖകളും സീനിയർ ഉദ്യോ​ഗസ്ഥർ കൈവശം വെക്കും. ട്രാഫിക് മാനേജ്മെന്റ്, വിഐപി ഡ്യൂട്ടി, ക്രമസമാധാന ചുമതലകൾ തുടങ്ങിയ പ്രത്യേക ചുമതലകൾ വഹിക്കുന്ന ഉദ്യോഗസ്ഥർ മൊബൈൽ ഫോൺ ഉപയോഗിക്കുന്നത് കർശനമായി വിലക്കിയിട്ടുണ്ട്.

പൊലീസ് ഉദ്യോഗസ്ഥരുടെ സംഘത്തിന് നേതൃത്വം നൽകുന്ന ഉദ്യോ​ഗസ്ഥന് മൊബൈൽ ഉപയോ​ഗിക്കാമെന്ന് നിർദേശത്തിൽ പറയുന്നു. അത്യാവശ്യഘട്ടങ്ങളിൽ അദ്ദേഹവുമായി ബന്ധപ്പെടാൻ മറ്റ് ഉദ്യോ​ഗസ്ഥർക്ക് മൊബൈൽ ഉപയോ​ഗിക്കാം. നടപടിയിലൂടെ പൊലീസ് ഉദ്യോ​ഗസ്ഥരുടെ കാര്യക്ഷമത മെച്ചപ്പെടുമെന്നും പൊതുജനങ്ങൾക്ക് മുന്നിൽ അവരുടെ പ്രതിച്ഛായ വർദ്ധിക്കുമെന്നുമാണ് വിലയിരുത്തൽ.