കേരളത്തിലേക്കുള്ള സർവീസുകൾ പുനരാരംഭിക്കാൻ കർണാടക ആർ.ടി.സി

കർണാടക ആർ.ടി.സി കേരളത്തിലേക്കുള്ള സർവീസുകൾ പുനരാരംഭിക്കുന്നു. ഈ മാസം 12 മുതൽ ബസുകൾ ഓടിതുടങ്ങുമെന്നാണ് റിപ്പോർട്ടുകൾ. കർണാടകയിൽ കോവിഡ്​ നിയന്ത്രണങ്ങളിൽ മൂന്നാം ഘട്ട ഇളവുകൾ പ്രഖ്യാപിച്ചതിന്​ പിന്നാലെയാണ് ബംഗളൂരു, മംഗളൂരു, മൈസൂരു, പുത്തൂർ എന്നിവിടങ്ങളിൽനിന്ന്​ കേരളത്തിന്റെ വിവിധ നഗരങ്ങളി​ലേക്കുള്ള ബസ് സർവീസുകൾ പുനരാരംഭിക്കുന്നത്​.

കേരളത്തിൽനിന്നുള്ള യാത്രക്കാർ 72 മണിക്കൂറിനുള്ളിൽ എടുത്ത കോവിഡ്​ നെഗറ്റിവ്​ സർട്ടിഫിക്കറ്റോ കോവിഡ്​ വാക്​സിൻ ഒറ്റത്തവണയെങ്കിലും സ്വീകരിച്ചതിന്റെ രേഖയോ കൈയിൽ കരുതണം. വിദ്യാഭ്യാസ-വാണിജ്യ ആവശ്യങ്ങൾക്കും മറ്റുമായി ദിനേന കർണാടകയിലേക്ക്​ കടക്കുന്നവർ 15 ദിവസത്തിലൊരിക്കൽ ആർ.ടി.പി.സി.ആർ ടെസ്​റ്റ്​ നടത്തി നെഗറ്റിവ്​ സർട്ടിഫിക്കറ്റ്​ കരുതണം.