വാടകക്ക് വീട് കിട്ടുന്നില്ല, ഭിക്ഷയെടുത്ത് ജീവിതം; ദയാവധത്തിന് അനുമതി തേടി ട്രാന്‍സ് യുവതി

ബെംഗളൂരു: വാടകക്ക് താമസിക്കാന്‍ വീട് കിട്ടുന്നില്ലെന്ന കാരണത്താല്‍ ദയാവധത്തിന് അനുമതി തേടി ട്രാന്‍സ് യുവതി. കര്‍ണാടക മടിക്കേരി സ്വദേശിയായ റിഹാനയാണ് കുടക് ജില്ലാ ഭരണകൂടത്തിന് അപേക്ഷ നല്‍കിയത്. ട്രാന്‍സ് ആണെന്ന കാരണത്താലാണ് തനിക്ക് വീട് നിഷേധിക്കുന്നതെന്നും ലോഡ്ജിലാണ് താമിക്കുന്നതെന്നും റിഹാന വ്യക്തമാക്കി.

വീട്ടുടമസ്ഥരെ സമീപിച്ചപ്പോഴെല്ലാം തനിക്ക് വീട് വാടകയ്ക്ക് നൽകാൻ അവർ വിസമ്മതിക്കുകയായിരുന്നുവെന്ന് റിഹാന ഒരു വീഡിയോയിൽ പറയുന്നു. ഇതിനുമുമ്പ് നിരവധി മെമ്മോറാണ്ടങ്ങൾ ജില്ലാ ഭരണകൂടത്തിന് നൽകിയിരുന്നെങ്കിലും ഫലമുണ്ടായില്ലെന്നും അവർ പറഞ്ഞു. പല തവണ പൊലീസിനെ സമീപിച്ചെങ്കിലും അനുകൂലമായ ഒരു നടപടി സ്വീകരിച്ചിട്ടില്ലെന്നും റിഹാന കൂട്ടിച്ചേര്‍ത്തു. ദയാവധം ആവശ്യപ്പെട്ട് കത്ത് നല്‍കിയിട്ടും പൊലീസ് നടപടി സ്വീകരിച്ചിട്ടില്ലെന്നും അവര്‍ വ്യക്തമാക്കി. ഭിക്ഷ യാചിച്ചാണ് റിഹാന ജീവിക്കുന്നത്.

''നമുക്കൊരു ജീവിതമില്ലേ? എന്തുകൊണ്ടാണ് സമൂഹം ഞങ്ങളോട് ഇത്ര മോശമായി പെരുമാറുന്നത്? വീട്ടുടമസ്ഥർ ആവശ്യപ്പെടുന്ന വാടക നൽകാൻ തയ്യാറാണെന്നും'' റിഹാന പറഞ്ഞു. മാനസിക ക്ലേശങ്ങളും പീഡനങ്ങളും അപമാനവും അവഗണനയും സഹിക്കാൻ വയ്യാത്തതിനാൽ തന്‍റെ ദയാഹത്യയുടെ തിയതി നിശ്ചയിക്കാൻ അധികാരികൾക്ക് അവസാനമായി കത്തെഴുതിയതായും ട്രാൻസ്‌ യുവതി പറഞ്ഞു.