വിദേശത്ത് പഠിക്കുന്ന കുട്ടികള്‍ക്ക് പണമയക്കാന്‍ ചെലവ് കൂടും

ഡല്‍ഹി: വിദേശത്ത് പഠിക്കുന്ന കുട്ടികള്‍ക്കായി പണം അയക്കാന്‍ മാതാപിതാക്കള്‍ക്ക് ഇനി കൂടുതല്‍ പണം ചെലവഴിക്കേണ്ടി വരും. വിദ്യാഭ്യാസ ചെലവുകള്‍ക്കോ ചികിത്സക്കോ അല്ലാതെ മറ്റാവശ്യങ്ങള്‍ക്കായി വിദേശത്തേക്ക് പണമയക്കുമ്പോള്‍ 20 ശതമാനം നികുതി ഈടാക്കാനാണ് കേന്ദ്രസര്‍ക്കാരിന്‍റെ തീരുമാനം. ധനമന്ത്രി നിര്‍മല സീതാരാമന്‍ ഇത്തവണ അവതരിപ്പിച്ച ബജറ്റിലാണ് രാജ്യത്ത് നിന്ന് പണം കൈമാറ്റം ചെയ്യുമ്പോഴുള്ള നികുതി നിയമങ്ങളില്‍ മാറ്റം പ്രഖ്യാപിച്ചത്.

ഇന്ത്യാക്കാര്‍ക്ക് വിദേശത്തേക്ക് പണം അയക്കാന്‍ അനുവദിക്കുന്ന ലിബറലൈസ്ഡ് റെമിറ്റൻസ് സ്കീമിന് (എൽആർഎസ്) കീഴിലുള്ള വിദേശ പണമിടപാടുകൾക്ക് സ്രോതസില്‍ നികുതി പിരിവ് (ടിസിഎസ്) 5 ശതമാനത്തിൽ നിന്ന് 20 ശതമാനമായി ഉയർത്താനായിരുന്നു ബജറ്റിലെ നിര്‍ദേശം. വിദേശ യാത്രകൾ, വിദേശ നിക്ഷേപം, വിദേശത്തേക്ക് പണം അയയ്ക്കൽ, വിദ്യാഭ്യാസത്തിനും മെഡിക്കൽ ആവശ്യങ്ങൾക്കും ഒഴികെയുള്ള മറ്റ് പണമയക്കലുകൾക്ക് ഇത് ബാധകമാകും.

നിലവിലെ നിയമപ്രകാരം, ഒരു സാമ്പത്തിക വര്‍ഷം ഏഴു ലക്ഷം രൂപ വരെ വിദേശത്തേക്ക് അയക്കുമ്പോള്‍ സ്രോതസില്‍ നികുതി നല്‍കേണ്ടതില്ല. ഏഴു ലക്ഷം രൂപയില്‍ കൂടുതലുള്ള തുകയ്ക്ക് അഞ്ചു ശതമാനം ടി.സി.എസ് ഈടാക്കുന്നുണ്ട്. എന്നാല്‍, പുതിയ ബജറ്റ് നിര്‍ദേശം അനുസരിച്ച് വിദ്യാഭ്യാസവും ചികിത്സയും അല്ലാതെ മറ്റെന്ത് ആവശ്യത്തിന് വിദേശത്തേക്ക് പണമയച്ചാലും, അയക്കുന്ന ആകെ തുകയുടെ 20 ശതമാനം പിടിച്ചുവയ്ക്കും.അയക്കുന്നത് എത്ര ചെറിയ തുകയാണെങ്കിലും 20 ശതമാനം നികുതി നല്‍കണം. പുതിയ നിർദേശമനുസരിച്ച്, വിദേശത്ത് പഠിക്കുന്ന വിദ്യാർഥികളുടെ ജീവിതച്ചെലവുകൾ (നേരിട്ടുള്ള വിദ്യാഭ്യാസച്ചെലവല്ല) നികത്താനുള്ള ഏതൊരു പണവും വിദ്യാഭ്യാസ ആവശ്യങ്ങൾക്കായി അയച്ചതാണെന്ന് മാതാപിതാക്കൾ സ്ഥാപിക്കുന്നതിൽ പരാജയപ്പെട്ടാൽ, ഇപ്പോൾ 20 ശതമാനം ടി.സി.എസ് നല്‍കേണ്ടി വരും.

ഹോസ്റ്റൽ ചെലവുകൾക്കോ ​​ട്യൂഷൻ ഫീസിനോ ആയി ട്രാൻസ്ഫർ ചെയ്ത പണം എളുപ്പത്തിൽ കാണിക്കാനാകും."നിങ്ങളുടെ കുട്ടി യൂണിവേഴ്സിറ്റിയുടെ ഹോസ്റ്റലിൽ താമസിക്കുന്നുണ്ടെങ്കിൽ, അത് വിദ്യാഭ്യാസ ആവശ്യത്തിനാണെന്ന് നിങ്ങൾക്ക് സ്ഥാപിക്കാം. 7 ലക്ഷം രൂപയ്ക്ക് മുകളിലാണ് പണമയക്കുന്നതെങ്കിൽ 5 ശതമാനം ടി.സി.എസ് ബാധകമാകും," ടാക്സ് കണക്ട് അഡ്വൈസറി വിവേക് ​​ജലൻ ഇക്കണോമിക് ടൈംസിനോട് പറഞ്ഞു. എന്നാല്‍ കാമ്പസിനു പുറത്തുള്ള ഫ്ലാറ്റുകളിലോ രണ്ടു മൂന്നു പേര്‍ ഒരുമിച്ച് അപ്പാർട്ടുമെന്റുകളിലോ വാടകയ്ക്ക് താമസിക്കുന്നവർക്ക് വിദ്യാഭ്യാസ ലിങ്ക് സ്ഥാപിക്കാൻ ബുദ്ധിമുട്ടായേക്കാം, ജലൻ കൂട്ടിച്ചേർത്തു.

എല്‍.ആര്‍.എസ് പ്രകാരം വിദേശത്തേക്ക് പണം അയക്കുന്നതിന്, ഒരാൾ ബാങ്കിൽ പോയി A-2 ഫോം പൂരിപ്പിച്ച് പണമയച്ചതിന്‍റെ ഉദ്ദേശ്യം വ്യക്തമാക്കുകയും ഡിക്ലറേഷൻ ഫോമിൽ ഒപ്പിടുകയും വേണം.ബാങ്ക് പിന്നീട് അക്കൗണ്ടിൽ നിന്ന് ഡെബിറ്റ് ചെയ്ത് വിദേശത്തേക്ക് അയക്കുന്നു. രണ്ട് ബാങ്ക് അക്കൗണ്ടുകൾ തമ്മിലുള്ള, ഡെബിറ്റ്, ഫോറെക്സ് കാർഡുകൾ വഴിയുള്ള ഇടപാടുകളും എൽആർഎസ് സ്കീമിന് കീഴിലാണെന്ന് ഇ.വൈ ഇന്ത്യയുടെ നയ ഉപദേശക & സ്പെഷ്യാലിറ്റി സേവനങ്ങളുടെ നേതാവ് രാജീവ് ചുഗ് പറഞ്ഞു. ജൂലൈ 1 മുതല്‍ പുതിയ നിര്‍ദേശം പ്രാബല്യത്തില്‍ വരും.