മൂന്നാമതും പെൺകുഞ്ഞ്; അനധികൃത ​ഗർഭഛിദ്രത്തിനിടെ യുവതി മരിച്ചു; മാതാപിതാക്കളടക്കം അറസ്റ്റിൽ

ബെം​ഗളൂരു: അനധികൃത ​ഗർഭഛിദ്ര ശസ്ത്രക്രിയക്ക് ഇരയായി ഗർഭിണി മരിച്ച സംഭവത്തിൽ മാതാപിതാക്കളടക്കം ഒമ്പതു പേർ അറസ്റ്റിൽ. കർണാടക ബാ​ഗൽകോട്ട് ജില്ലയിലെ മഹാലിം​ഗ്പൂർ ടൗണിലാണ് സംഭവം. യുവതിയെ മാതാപിതാക്കൾ പെൺ ഭ്രൂണ​ഹത്യയ്ക്ക് പ്രേരിപ്പിച്ചെന്നാണ് പൊലീസിന്റെ കണ്ടെത്തൽ. യുവതിയുടെ പിതാവ് സഞ്ജയ് ​ഗൗളി, മാതാവ് സം​ഗീത ​ഗൗളി എന്നിവരും മറ്റ് ഏഴു പേരുമാണ് അറസ്റ്റിലായത്. 

മഹാരാഷ്ട്രയിലെ സാംഗ്ലിയിൽ ഭർത്താവിനൊപ്പം താമസിക്കുന്ന 33കാരിയായ മകൾ സൊനാലിയാണ് മരിച്ചത്. കർണാക പൊലീസാണ് പിതാവിനെയും മാതാവിനേയും അറസ്റ്റ് ചെയ്തത്. സൊനാലിക്ക് രണ്ട് പെൺമക്കളാണ്.

വീണ്ടും ​ഗർഭിണിയായതോടെ നടത്തിയ അനധികൃത പരിശോധനയിൽ മൂന്നാമത്തേതും പെൺഭ്രൂണമാണെന്ന് മനസിലായതോടെ നിർബന്ധിത ​ഗർഭഛിദ്രത്തിന് വിധേയയാവുകയായിരുന്നു.

ആദ്യ രണ്ട് മക്കളും പെൺകുട്ടികൾ ആയതിനാൽ മാതാപിതാക്കളാണ് സൊനാലിയെ ​ഭ്രൂണഹത്യക്ക് പ്രേരിപ്പിച്ചത്. പെൺഭ്രൂണഹത്യ നടത്താൻ മകളെ പ്രേരിപ്പിച്ചെന്ന് ചൂണ്ടിക്കാട്ടിയാണ് രക്ഷിതാക്കൾക്കെതിരെ കേസെടുത്തിരിക്കുന്നത്.

മഹാലിം​ഗപൂരിലെ യുവതിയുടെ വീട്ടിൽ തന്നെയായിരുന്നു ​ഗർഭഛിദ്ര ശസ്ത്രക്രിയ നടന്നത്. എന്നാൽ മെയ് 27ന് യുവതി അമിതരക്തസ്രാവം ഉൾപ്പെടെയുള്ള പ്രശ്നങ്ങൾ മൂലം മരിക്കുകയായിരുന്നു.

സംഭവത്തിൽ മുഖ്യപ്രതിയായ നഴ്സ് കവിത ബഡ്ഡനാവർ അടക്കം ഏഴ് പേരെ മഹാരാഷ്ട്ര പൊലീസും സാം​ഗ്ലിയിൽ നിന്ന് അറസ്റ്റ് ചെയ്തിട്ടുണ്ട്. കവിതയാണ് യുവതിയെ ​ഗർഭഛി​ദ്രത്തിന് ഇരയാക്കിയത്.

ഭ്രൂണത്തിൻ്റെ ലിംഗം സ്ഥിരീകരിക്കാൻ സൊനാലി മഹാരാഷ്ട്രയിൽ സ്കാനിങ് നടത്തിയെന്നും ഗർഭച്ഛിദ്രം നടത്താൻ പ്രതിയായ നഴ്‌സിന് 40,000 രൂപ നൽകിയെന്നും പ്രാഥമിക അന്വേഷണത്തിൽ കണ്ടെത്തി.