പൊലീസിനെ അക്രമിച്ച് രക്ഷപ്പെടാൻ പിടികിട്ടാപ്പുള്ളിയുടെ ശ്രമം; ആറ് പൊലീസുകാർക്ക് പരിക്ക്
കുന്ദമംഗലം സ്വദേശി ടിങ്കുവെന്ന ഷിജുവാണ് പൊലീസ് കസ്റ്റഡിയിൽ നിന്ന് രക്ഷപ്പെടാൻ ശ്രമിച്ചത്.
Update: 2021-11-18 14:24 GMT
കോഴിക്കോട് പിടികിട്ടാപ്പുള്ളിയെ പിടികൂടാനായി പോയ പോലീസുകാർക്ക് നേരെ ആക്രമണം. വിവിധ ജില്ലകളിൽ കേസുകളുള്ള കുന്ദമംഗലം സ്വദേശി ടിങ്കുവെന്ന ഷിജുവാണ് പൊലീസ് കസ്റ്റഡിയിൽ നിന്ന് രക്ഷപ്പെടാൻ ശ്രമിച്ചത്. പ്രതികളുടെയും കൂട്ടാളികളുടെയും ആക്രമണത്തിൽ ആറ് പോലീസുകാർക്ക് പരിക്കേറ്റു.
ഡെൻസാഫ് സ്‌ക്വാഡ് അംഗം ജോമോന്റെ കാൽ മുട്ടിന് ഗുരുതര പരിക്കേറ്റു. ജോമോനെ അടിയന്തിര ശസ്ത്രക്രിയക്ക് വിധേയനാക്കി. ക്വട്ടേഷൻ അടക്കം നിരവധി കേസുകളിൽ പ്രതിയായ ടിങ്കു മാവൂർ കുന്ദംമംഗലം അതിർത്തിയിലെ ഒരു കല്യാണത്തിൽ പങ്കെടുക്കാൻ എത്തിയതായി പൊലീസിന് വിവരം കിട്ടി. ഇയാളെ ഇവിടെയെത്തി കസ്റ്റഡിയിലെടുക്കുന്നതിനിടെ പൊലീസിനെ ആക്രമിക്കുകയായിരുന്നു.
തുടർന്ന് മെഡിക്കൽ കൊളേജ് പൊലീസ് സ്റ്റേഷനിലെത്തിച്ച പ്രതി ഇവിടെ നിന്നും രക്ഷപ്പെടാൻ ശ്രമിച്ചു . റോഡിന്റെ നടുക്ക് നിർത്തിയിട്ട വാഹനത്തിന്‌ മുകളിൽ കയറിനിന്ന് ഇയാൾ പൊലീസിനെ വെല്ലുവിളിക്കുകയും ചെയ്തു. പിന്നീട് പൊലീസ് ഇയാളെ കൂട്ടം ചേർന്ന് പിടികൂടുകയായിരുന്നു. ടിങ്കുവിന്റെ കൂട്ടാളികളെ പിടികൂടാൻ പൊലീസിന് കഴിഞ്ഞിട്ടില്ല