'താമരശ്ശേരിയിലെ റെസ്റ്റോറന്റിൽ കെ.സി വേണുഗോപാൽ എം.പി മദ്യപിക്കുന്നു'; ബിജെപി ഐടി സെല്ലിന്റെ വ്യാജ പ്രചാരണം പൊളിച്ച് മുഹമ്മദ് സുബൈർ

കോൺ​ഗ്രസ് നേതാവും ആലപ്പുഴ എം.പിയുമായ കെ.സി വേണു​ഗോപാൽ താമരശ്ശേരിയിലെ റെസ്റ്റോറന്റിലിരുന്ന് കട്ടൻചായ കുടിക്കുന്നതിനെ മദ്യപിക്കുന്നതാക്കി സോഷ്യൽമീഡിയയിൽ ഹിന്ദുത്വ വ്യാജ പ്രചാരണം. Facts @BefittingFacts എന്ന ബിജെപി ഐടി സെൽ എക്സ് അക്കൗണ്ടിലൂടെയുള്ള വ്യാജ പ്രചാരണം പൊളിച്ച് ഫാക്ട് ചെക്കിങ് സൈറ്റായ ആൾട്ട് ന്യൂസിന്റെ സഹസ്ഥാപകൻ മുഹമ്മദ് സുബൈർ രം​ഗത്തെത്തി.

താമരശ്ശേരിയിലെ വൈറ്റ് ഹൗസ് റെസ്റ്റോറന്റിൽ നിന്നുള്ള ദൃശ്യങ്ങളിലെ ഒരു ഭാ​ഗമെടുത്തായിരുന്നു വ്യാജ പ്രചാരണം. കെ.സി വേണു​ഗോപാലിന്റെ ചിത്രം നൽകി 'ഈ റെസ്റ്റോറൻ്റിന് മദ്യം വിൽക്കാനുള്ള ലൈസൻസ് ഇല്ല. ഇവർ എങ്ങനെയാണ് കോൺഗ്രസ് നേതാക്കൾക്ക് മദ്യം വിളമ്പുന്നത്?'- എന്ന് ചോദിച്ചായിരുന്നു കേരളാ പൊലീസിനെയും എക്സൈസ് വകുപ്പിനെയും മുഖ്യമന്ത്രിയേയും ടാ​ഗ് ചെയ്തുകൊണ്ടുള്ള പോസ്റ്റ്. താമരശ്ശേരിയിലെ വൈറ്റ്ഹൗസ് എന്ന റെസ്റ്റോറന്റിൽ നിന്നുള്ള ദൃശ്യമായിരുന്നു ഇത്.

എന്നാൽ, ഈ റെസ്റ്റോറന്റിന്റെ മാനേജറായ കബീറുമായി താൻ സംസാരിച്ചെന്നും കെ.സി വേണു​ഗോപാൽ കുടിച്ചത് മദ്യമല്ല, കട്ടൻചായയാണെന്ന് അദ്ദേഹം വ്യക്തമാക്കിയതായും മുഹമ്മദ് സുബൈർ എക്സിൽ കുറിച്ചു. ലോക്സഭാ തെരഞ്ഞെടുപ്പ് വിജയത്തിനു ശേഷം തന്റെ മണ്ഡലമായ വയനാട്ടിലേക്കുള്ള യാത്രയ്ക്കിടെ രാഹുൽ ​ഗാന്ധിയും കെ.സി വേണുഗോപാലുമടക്കുള്ള കോൺ​ഗ്രസ് നേതാക്കൾ ഈ റെസ്റ്റോറന്റിൽ കയറിയിരുന്നു.

റെസ്റ്റോറന്റിൽ നിന്നും ഊണും ഐസ്ക്രീമും ഉൾപ്പെടെ നേതാക്കൾ കഴിക്കുകയും ചെയ്തിരുന്നു. ഇതിന്റെ ദൃശ്യങ്ങൾ സ്വതന്ത്ര വാർത്താ ഏജൻസിയായ ഐഎഎൻഎസ് എക്സിൽ പങ്കുവയ്ക്കുകയും ചെയ്തു. ഒരു ഐസ്ക്രീം രാഹുൽ ​ഗാന്ധി കെ.സി വേണു​ഗോപാലിന് കൈമാറുമ്പോൾ അദ്ദേഹം വേണ്ട എന്നു പറഞ്ഞ് നിരസിക്കുന്നതും ഈ സമയം അദ്ദേഹത്തിന്റെ വലതുകൈയിൽ കട്ടൻ ചായ ഇരിക്കുന്നതും ദൃശ്യങ്ങളിൽ കാണാം. തുടർന്ന് റെസ്റ്റോറന്റ് സ്റ്റാഫുകൾക്കൊപ്പം നിന്ന് സെൽഫിയെടുത്ത ശേഷമാണ് രാഹുൽ ​ഗാന്ധിയും സംഘവും ഇവിടെ നിന്ന് മടങ്ങിയത്.

ഈ ദൃശ്യങ്ങളിൽ നിന്നും കട്ടൻചായ ഭാ​ഗം മാത്രം മുറിച്ചെടുത്താണ് പശ്ചിമബം​ഗാളിൽ നിന്നുള്ള ബിജെപി ഐടി സെൽ അം​ഗത്തിന്റെ എക്സ് അക്കൗണ്ടിലൂടെ വ്യാജ പ്രചാരണം നടത്തിയത്. നിരവധി സംഘ്പരിവാർ അനുകൂല പ്രൊഫൈലുകളാണ് ഇത് ഷെയർ ചെയ്തത്. അതേസമയം, സുബൈറിന്റെ പോസ്റ്റിനടിയിൽ, വ്യാജ പ്രചാരകനെതിരെ നടപടിയാവശ്യപ്പെട്ടും ഇയാളെ ന്യായീകരിച്ചും നിരവധി പേർ രം​ഗത്തെത്തിയിട്ടുണ്ട്.

വ്യാജ വിവരം പങ്കുവച്ചതിനും സംസ്ഥാനത്തിന്റെ പ്രതിച്ഛായയ്ക്ക് കളങ്കമുണ്ടാക്കിയതിനും ബിജെപി ഐടി സെൽ അം​ഗമായ @BefittingFacts അക്കൗണ്ടുടമയെ അറസ്റ്റ് ചെയ്യണമെന്ന് ബിഹാറിലെ ആക്ടിവിസ്റ്റും ഫാഷൻ ഡിസൈനറുമായ പ്രിയങ്ക ദേശ്മുഖ് അടക്കമുള്ളവർ ആവശ്യപ്പെട്ടിട്ടുണ്ട്.