പൊലീസിൽ ആർഎസ്എസ് സ്വാധീനമുണ്ട്: കോടിയേരി ബാലകൃഷ്ണൻ

കേരള പൊലീസിൽ ആർഎസ്എസ് സ്വാധീനമുണ്ടെന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണൻ. കേരളത്തിൽ എല്ലാ രാഷ്ട്രീയക്കാരുണ്ടെന്നും പൊലീസിലെ പ്രശ്‌നങ്ങൾ എല്ലാ കാലത്തും ഉള്ളതാണെന്നും അദ്ദേഹം വ്യക്തമാക്കി. സിപിഎം തിരുവനന്തപുരം ജില്ലാ സമ്മേളനത്തിടക്കം പൊലീസിനെതിരെ രൂക്ഷമായ വിമർശനമുയർന്ന സാഹചര്യത്തിലാണ് അദ്ദേഹത്തിന്റെ പ്രതികരണം.

അതേസമയം സിപിഎം തിരുവനന്തപുരം ജില്ലാ സമ്മേളനത്തിൽ മന്ത്രിമാർക്കും വിവിധ വകുപ്പുകൾക്കുമെതിരെ ഉയർന്ന വിമർശനങ്ങളെ കോടിയേരി ബാലകൃഷ്ണൻ പ്രതിരോധിച്ചു. സർക്കാരിന് വേഗം പോരെന്ന് തുടങ്ങുന്ന നിരവധി വിമർശനങ്ങൾക്കാണ് അദ്ദേഹം മറുപടി നൽകിയത്. 5 കൊല്ലം പിന്നിട്ട സർക്കാരിനോടാണ് 9 മാസം പ്രായമായതിനെ താരതമ്യം ചെയ്യുന്നതെന്ന് അദ്ദേഹം കൂട്ടിച്ചേർത്തു. സർക്കാരിന് സാവകാശം നൽകണമെന്നും കഴിഞ്ഞ സർക്കാരിലും മന്ത്രിമാർ ഏറെ കുറെ പുതുമുഖങ്ങളായിരുന്നെന്നും കോടിയേരി പറഞ്ഞു. വിമർശനങ്ങൾ അതത് വകുപ്പുകളുടെ ശ്രദ്ധയിൽപ്പെടുത്തും. ജനകീയ പ്രശ്‌നങ്ങളിൽ പൊലീസ് സ്റ്റേഷനിൽ പോകാൻ തടസമില്ല. അതിന് ആരും തടയില്ല. മാഫിയകൾക്ക് വേണ്ടി ഒരിക്കലും ഇടപെടരുത്.കോടിയേരി കൂട്ടിച്ചേർത്തു.