തമിഴ്നാട് മധുരയില്‍ വാഹനാപകടം; നാല് മലയാളികൾ മരിച്ചു
Update: 2018-05-31 05:29 GMT
കാറും ലോറിയും കൂട്ടിയിടിച്ചാണ് അപകടം
തമിഴ്‌നാട്ടിലെ മധുരക്ക് സമീപം തിരുമംഗലത്ത് വാഹനാപകടത്തില്‍ നാല് മലയാളികള്‍ മരിച്ചു. കൊല്ലം പള്ളിമുക്ക് സ്വദേശികളാണ് മരിച്ചത്.പരിക്കെറ്റ രണ്ട് യുവതികളെ തമിഴ്‌നാട്ടിലെ സ്വകാര്യ ആശുപത്രിയില്‍ പ്രവേശിപ്പിച്ചു. അപകടം വരുത്തി വച്ച ലോറി ഡ്രൈവര്‍ മുത്തയ്യയെ പൊലീസ് അറസ്റ്റ് ചെയ്തു
മധുരയ്ത് സമീപം തിരുമംഗലത്ത് ഇന്ന് രാവിലെ 10 മണിയോടെയാണ് അപകടം ഉണ്ടായത്. മധുരയിലേക്ക് പോയ കാറില്‍ മിനി ലോറി ഇടിച്ചായിരുന്നു അപകടം. അപകടത്തില്‍ കൊല്ലം പള്ളിമുക്ക് സ്വദേശികളായ നൂര്‍ജഹാന്‍, മകള്‍ സജീന ഫിറോസ്, ഇവരുടെ മകള്‍ ഖദീജ, മരുമകന്‍ സജീര്‍ സലീം എന്നിവര്‍ അപകടത്തില്‍ മരിച്ചു. സജീനയുടെ മകള്‍ ഫാത്തിമയ്ക്കും ആയിഷക്കും അപകടത്തില്‍ ഗുരുതരമായി പരിക്കേറ്റു. ആയിഷയുടെ ചികിത്സക്കായാണ് ഇന്ന് പുലര്‍ച്ചെ ആറരക്ക് കുടുംബം തമിഴ് നാട്ടിലെക്ക് പോയത്.
അപകടം വരുത്തി വച്ച ലോറിയുടെ ഡ്രൈവര്‍ മുത്തയ്യയെ കല്ലും പെട്ടി പോലീസ് അറസ്റ്റ് ചെയ്തിട്ടുണ്ട്. മരിച്ച നാല് പേരുടെയും മൃതശരീരം പോസ്റ്റ് മാര്‍ട്ടത്തിനായി ഉസിലാംപെട്ടി സര്‍ക്കാര്‍ ആശുപത്രിയില്‍ സൂക്ഷിച്ചിരിക്കുകയാണ്. കൊല്ലത്ത് നിന്നും ബന്ധുക്കള്‍ ആശുപത്രിയില്‍ എത്തിയിട്ടുണ്ട്. അപകടത്തില്‍മരിച്ച സജീറിന്റെയും പരിക്കേറ്റ് കഴിയുന്ന ഫാത്തിമയുടെയും വിവാഹം കഴിഞ്ഞ മാസമാണ് നടന്നത്.