ചാമ്പ്യന്‍സ് ലീഗ് കിരീടത്തില്‍ മുത്തമിട്ട റയലിന്റെ ആഹ്ലാദം നേരം പുലരും വരെ ആരാധകര്‍ക്കൊപ്പം
Update: 2016-05-30 12:33 GMT
നാട്ടില്‍ തിരിച്ചെത്തിയ റയല്‍മാഡ്രിഡിന് ഗംഭീര സ്വീകരമാണ് ആരാധകര്‍ നല്‍കിയത്..സാന്റിയാഗോ ബെര്‍ണബ്യൂ സ്റ്റേഡിയത്തില്‍ ആയിരക്കണക്കിന് ആരാധകരാണ് റയല്‍ താരങ്ങള്‍ക്കൊപ്പം കിരീടനേട്ടം ആഘോഷിക്കാനെത്തിയത്
പതിനൊന്നാമതും ചാമ്പ്യന്‍സ് ലീഗ് കിരീടത്തില്‍ മുത്തമിട്ടതിന്റെ ആഹ്ലാദം ജന്‍മനാട്ടിലെ പ്രിയപ്പെട്ട ആരാധകര്‍ക്കൊപ്പം തകര്‍ത്ത് ആഘോഷിക്കുകയാണ് റയല്‍ താരങ്ങള്‍.
കിരീടവുമായി നഗരഹൃദയമായ സിബലെസ് സ്ക്വയര്‍ ചുറ്റിയ താരങ്ങളെ കാണാന്‍ ആയിരക്കണക്കിന് ആരാധകരാണ് തടിച്ചു കൂടിയത്..ടീമിന്റ ജഴസിയണിഞ്ഞും പടക്കം പൊട്ടിച്ചും അവര്‍ കിരീടനേട്ടം ആഘോഷിച്ചു..
പിന്നെ നേരെ പോയത് സാന്റിയാഗോ ബെര്‍ണബ്യൂ സ്റ്റേഡിയത്തിലേക്ക് .. സ്റ്റേഡിയത്തില്‍ തിങ്ങിനിറഞ്ഞ ആരാധകര്‍ക്കിടയിലേക്ക് തുറന്ന വാഹനത്തില്‍ താരങ്ങള്‍ എത്തിയപ്പോള്‍ ആരാധകരുടെ ആവേശം വാനോളമുയര്‍ന്നു..
നിങ്ങളുടെ പിന്തുണയാണ് ഞങ്ങളുടെ വിജയമെന്ന് ക്രിസ്റ്റ്യനോ റൊണാള്‍ഡോ പറഞ്ഞപ്പോള്‍ നിര്‍ത്താത്ത കയ്യടി.. പലര്‍ക്കും സന്തോഷം കൊണ്ട് കണ്ണ് നിറഞ്ഞു..
ആരാധകര്‍ക്കൊപ്പമുള്ള താരങ്ങളുടെ ആഘോഷം നേരം പുലരും വരെ തുടര്‍ന്നു.