കൊഹ്‍ലി സച്ചിനേക്കാള്‍ കേമനെന്ന് ഇമ്രാന്‍
Update: 2017-07-13 06:00 GMT
തീര്‍ത്തും ദുഷ്കരമായ സാഹചര്യങ്ങളിലാണ് കൊഹ്‍ലിയിലെ താരം കളം വാഴുന്നത്. ഇത് അത്രത്തോളം സച്ചിന് കഴിഞ്ഞിരുന്നില്ല.....
പ്രതിസന്ധി ഘട്ടങ്ങള്‍ തരണം ചെയ്യുന്നതില്‍ ഇന്ത്യന്‍ ഏകദിന നായകന്‍ വിരാട് കൊഹ്‍ലി ക്രിക്കറ്റ് ഇതിഹാസം സച്ചിന് ടെണ്ടുല്‍ക്കറെക്കാള്‍ മിടുക്കനാണെന്ന് മുന്‍ പാകിസ്താന്‍ നായകന്‍ ഇമ്രാന്‍ ഖാന്‍.
ക്രിക്കറ്റിന് ഓരോ കാലഘട്ടത്തിലും ഓരോ പ്രതിഭകളുണ്ടായിട്ടുണ്ട്. എണ്‍പതുകളില്‍ വിവ് റിച്ചാര്‍ഡ്സ്, പിന്നെ സച്ചിന് - ലാറ യുഗം. ഞാന്‍ കണ്ടിട്ടുള്ളതില്‍ വച്ച് ഏറ്റവും സമ്പൂര്‍ണരായ താരങ്ങളിലൊരാളാണ് കൊഹ്‍ലി. പ്രതിഭയും സാങ്കേതിക തികവും കൂടാതെ കൊഹ്‍ലിയെ വ്യത്യസ്തനാക്കുന്നത് പ്രതിസന്ധി ഘട്ടങ്ങളോടുള്ള അദ്ദേഹത്തിന്‍റെ സമീപനമാണ്. തീര്‍ത്തും ദുഷ്കരമായ സാഹചര്യങ്ങളിലാണ് കൊഹ്‍ലിയിലെ താരം കളം വാഴുന്നത്. ഇത് അത്രത്തോളം സച്ചിന് കഴിഞ്ഞിരുന്നില്ല - ഇമ്രാന്‍ പറഞ്ഞു.
ട്വന്‍റി20 ലോകകപ്പില്‍ പാകിസ്താനെ കൊഹ്‍ലി ഏകനായി തകര്‍ത്തത് വേദനയുണ്ടാക്കിയെങ്കിലും ആ ഇന്നിങ്സിനെ പുകഴ്ത്താതിരിക്കാനാകില്ല. ടീം പ്രതിസന്ധിയെ നേരിടുന്ന ഘട്ടങ്ങളില്‍ കൊഹ്‍ലിയുടെ ബാറ്റിങ് ശ്രദ്ധിക്കൂ. അന്തര്‍ദേശിയ തലത്തില്‍ തന്നെ ഇന്ന് നിലവിലുള്ള ഏറ്റവും മികച്ച കളിക്കാരിലൊരാളാണ് അയാള്‍. ക്രിക്കറ്റിന്‍റെ ഏത് രൂപത്തിലായാലും നിങ്ങള്‍ക്ക് അയാളില്‍ പരിപൂര്‍ണ വിശ്വാസം അര്‍പ്പിക്കാം.