ലോകകപ്പ് ഫുട്ബോള്‍ യോഗ്യതാ റൌണ്ട്: ഇറ്റലിക്കും സ്പെയിനും ജയം
ഇമ്മൊബീലെ ഇറ്റലിക്കായി ഇരട്ടഗോള്‍ നേടി
ലോകകപ്പ് ഫുട്ബോള്‍ യോഗ്യതാ റൌണ്ടില്‍ മുന്‍ ചാമ്പ്യന്മാരായ ഇറ്റലിക്കും സ്പെയിനും ജയം. സ്പെയിന്‍ അല്‍ബേനിയയെയും ഇറ്റലി മാസിഡോണിയയെയുമാണ് തോല്‍പ്പിച്ചത്. ഇമ്മൊബീലെ ഇറ്റലിക്കായി ഇരട്ടഗോള്‍ നേടി.
അല്‍ബേനിയക്കെതിരെ സമ്പൂര്‍ണ മേധാവിത്വം പുലര്‍ത്തിയാണ് സ്പെയിന്‍ ജയിച്ചു കയറിയത്. അമ്പത്തിയഞ്ചാം മിനുട്ടില്‍ ചെല്‍സി താരം ഡീഗോ കോസ്റ്റയാണ് സ്പെയിനിന്റെ ആദ്യ ഗോള്‍ നേടിയത്.
എട്ട് മിനുട്ടിനകം മാഞ്ചസ്റ്റര്‍ സിറ്റി താരം നൊളീറ്റോ വീണ്ടും അല്‍ബേനിയന്‍ വലയില്‍ പന്തെത്തിച്ചു.
സ്വന്തം മണ്ണില്‍ ഇറ്റലിയെ വിറപ്പിച്ചാണ് മാസിഡോണിയ കീഴടങ്ങിയത്.
ആന്‍ഡ്രിയ ബെലോട്ടി ഇറ്റലിയെ ആദ്യം മുന്നിലെത്തിച്ചെങ്കിലും 57ആം മിനുട്ടില്‍ നെസ്റ്റ്രോവോസ്കി മാസിഡോണിയയെ ഒപ്പമെത്തിച്ചു. പിന്നാലെ ഹസാനിയിലൂടെ മുന്നിലെത്തി.
എന്നാല്‍ ഇരട്ട ഗോള്‍ നേടി ഇമ്മൊബീലെ ഇറ്റലിയുടെ മാനം കാത്തു. എഴുപത്തിയഞ്ചിലും ഇഞ്ചുറിടൈമിലുമാണ് ഇമ്മൊബീലെയുടെ ഗോളുകള്‍.