ഉനദ്ഘട്ടിന് ഹാട്രിക്ക്, അഞ്ച് വിക്കറ്റ്; പൂനെക്ക് ജയം
ഉനദ്ഘട്ട് നാലോവറിൽ 30 റണ്‍സ് വഴങ്ങി അഞ്ചു വിക്കറ്റ് നേടി
ജയദേവ് ഉനദ്ഘടിന്‍റെ ഹാട്രിക്കിന്‍റെ മികവിൽ സണ്‍റൈസേഴ്സ് ഹൈദരാബാദിനെതിരേ റൈസിംഗ് പൂന സൂപ്പർ ജയന്‍റിന് വിജയം. 12 റണ്‍സിനാണ് പൂനയുടെ വിജയം. പൂന ഉയർത്തിയ 149 റണ്‍സ് ലക്ഷ്യം പിന്തുടർന്ന സണ്‍റൈസേഴ്സിന് നിശ്ചിത ഓവറിൽ 136 റണ്‍സിന് പുറത്തായി. ഉനദ്ഘട്ട് നാലോവറിൽ 30 റണ്‍സ് വഴങ്ങി അഞ്ചു വിക്കറ്റ് നേടി.
ടേസ് നഷ്ടപ്പെട്ട് ബാറ്റിംഗിനിറങ്ങിയ പൂനക്ക് തുടക്കത്തിൽത്തന്നെ രാഹുൽ ത്രിപതിയെ നഷ്ടമായെങ്കിലും രഹാനെ(22), സ്റ്റീവ് സ്മിത്ത്(34), ബെൻ സ്റ്റോക്സ്(39), എം.എസ്.ധോണി(31) എന്നിവർ നടത്തിയ മികച്ച ബാറ്റിംഗ് പൂനയ്ക്കു ഭേദപ്പെട്ട സ്കോർ നൽകി. മറ്റാർക്കും രണ്ടക്കം കടക്കാൻ കഴിഞ്ഞതുമില്ല. സണ്‍റൈസേഴ്സിനായി സിദ്ധാർഥ് കൗൾ 29 റണ്‍സ് വഴങ്ങി നാലു വിക്കറ്റ് നേടി.
മറുപടി ബാറ്റിംഗിനിറങ്ങിയ സണ്‍റൈസേഴ്സിന് ധവാൻ(19), വാർണർ(40) എന്നിവർ ചേർന്നു മികച്ച തുടക്കം നൽകി. ശേഷം യുവരാജ് സിംഗ്(47) ഇന്നിംഗ്സിന്‍റെ ചുമതല ഏറ്റെടുത്തെങ്കിലും പിന്തുണ നൽകാൻ ആരുമില്ലാതെ പോയി. മൂവർക്കുമൊഴികെ മറ്റാർക്കും സണ്‍റൈസേഴ്സ് നിരയിൽ രണ്ടക്കം കടക്കാൻ കഴിഞ്ഞില്ല. അവസാന ഓവറിൽ ഹാട്രിക്കുമായി ഉനദ്ഘട്ട് കളംനിറഞ്ഞതോടെ ഹൈദരാബാദിന്‍റെ പ്രതീക്ഷകൾ അവസാനിക്കുകയും ചെയ്തു.
സ്കോർ: റൈസിംഗ് പൂന സൂപ്പർ ജയന്‍റ്- 148/8(20). സണ്‍റൈസേഴ്സ് ഹൈദരാബാദ്- 136/9(20).