'ചരിത്രത്തിലെ ഏറ്റവും മികച്ച ക്യാച്ച്'; അതിശയിപ്പിച്ച് ബ്രാഡ് കറി

ബ്രൈറ്റണ്‍: ടി 20 ക്രിക്കറ്റ് ബാറ്റര്‍മാരുടെ പൂരപ്പറമ്പ് മാത്രമല്ല. പലപ്പോഴും ബോളര്‍മാരും ഫീല്‍ഡര്‍മാരുമൊക്കെ അതിശയിപ്പിക്കുന്ന പ്രകടനങ്ങള്‍ മൈതാനത്ത് കാഴ്ചവക്കാറുണ്ട്. അങ്ങിനെയൊരു അവിസ്മരണീയ മുഹൂര്‍ത്തത്തിന് വേദിയായിരിക്കുകയാണിപ്പോള്‍ ഇംഗ്ലണ്ടിലെ ടി 20 ബ്ലാസ്റ്റ് ക്രിക്കറ്റ് ലീഗ്. ലീഗില്‍ നിലവിലെ ചാമ്പ്യന്മാരായ ഹാംസ്ഫയറും സസക്സും തമ്മില്‍ അരങ്ങേറിയ പോരാട്ടത്തില്‍ സസക്സ് താരം ബ്രാഡ് കറി നേടിയൊരു ക്യാച്ചാണ് ഇപ്പോള്‍ ക്രിക്കറ്റ് ലോകത്തെ ചര്‍ച്ചകളില്‍ നിറയെ.

മത്സരത്തിൽ സസക്‌സ് ഉയർത്തിയ 183 റൺസ് വിജയലക്ഷ്യം പിന്തുടരുകയായിരുന്നു ഹാംസ്ഫയർ. കളിയുടെ 19ാം ഓവർ എറിയാനെത്തിയത് സസക്സ് താരം ടിമൽ മിൽസ്. മിൽസിന്റെ ഓവറിലെ മൂന്നാം പന്തിൽ ഒരു മികച്ച സ്വീപ്പ് ഷോട്ടുതിർത്ത ബെന്നി ഹോവെൽ പന്തിനെ അതിർത്തിയിലേക്ക് പായിച്ചു. സിക്‌സെന്നുറപ്പിച്ച ആ പന്ത് ബൗണ്ടറി ലൈനിന് മുകളിലേക്ക് പായവേ ബൗണ്ടറിന് ലൈന് അടുത്തുണ്ടായിരുന്ന ബ്രാഡ് കറി പറന്നുയർന്ന്  പന്തിനെ കൈപ്പിടിയിലാക്കുകയായിരുന്നു. കമന്ററി ബോക്‌സിനെ വരെ പൊട്ടിത്തെറിപ്പിച്ച ക്യാച്ച് ക്രിക്കറ്റ് ലോകത്ത് പെട്ടെന്നാണ് വൈറലായത്. ക്രിക്കറ്റ് ചരിത്രത്തിലെ ഏറ്റവും മികച്ച ക്യാച്ച് എന്ന പേരിലാണ് പലരും വീഡിയോ ഷെയര്‍ ചെയ്തത്. ഇന്ത്യന്‍ താരം ദിനേശ് കാര്‍ത്തിക്കും ഇംഗ്ലീഷ് താരം ബെന്‍ സ്റ്റോക്സും അടക്കമുള്ളവര്‍ താരത്തിന് അഭിനന്ദനങ്ങളുമായി രംഗത്തെത്തി.

ബ്രാഡ് കറിയുടെ ക്യാച്ച് മത്സരത്തിന്റെ ഗതിയെ തന്നെ തിരിച്ചു. മികച്ച രീതിയിൽ ബാറ്റ് വീശുകയായിരുന്ന ഹാവെൽസ് പുറത്തായതോടെ ഹാംസ്‌ഫെയർ പതറി. മത്സരത്തിൽ സസക്‌സ് ആറ് റൺസിന്റെ വിജയം കുറിക്കുകയും ചെയ്തു.  നാലോവറില്‍ 27 റണ്‍സ് വഴങ്ങി മൂന്ന് വിക്കറ്റ് വീഴ്ത്തി ബോളിങ്ങിലും മിന്നും പ്രകടനം പുറത്തെടുത്ത കറി തന്നെയായിരുന്നു കളിയിലെ താരവും .