ട്രാഫിക് നിയമ ലംഘനത്തെ മഹത്വവത്കരിക്കുന്നു; ധോനിയുടെ പരസ്യം പിൻവലിക്കാൻ ഉത്തരവ്

ഡൽഹി: ചെന്നൈ സൂപ്പർ കിങ്സ് താരം എംഎസ് ധോനി അഭിനയിച്ച ഐപിഎൽ പ്രമോഷൻ പരസ്യം പിൻവലിക്കും. അഡ്വർടൈസിങ് സ്റ്റാൻഡേർഡ് കൗൺസിൽ ഓഫ് ഇന്ത്യയാണ് പരസ്യം പിൻവലിക്കാൻ നിർദേശിച്ചിരിക്കുന്നത്.

റോഡ് സേഫ്റ്റി ഓർഗനൈസേഷൻ നൽകിയ പരാതി പരിഗണിച്ചാണ് നിർദേശം. മാർച്ച് നാലിനാണ് ഈ പരസ്യം പുറത്തിറങ്ങിയത്. ബസ് ഡ്രൈവറായാണ് ധോനി എത്തുന്നത്. സൂപ്പർ ഓവർ മത്സരം കാണാനായി റോഡിന് നടുവിൽ ബസ് നിർത്തിയിരിക്കുന്നു. ഈ സമയം ട്രാഫിക് പൊലീസ് വന്ന് കാര്യം തിരക്കുകയും, സൂപ്പർ ഓവർ എന്ന് ധോനി പറയുകയും ചെയ്യുന്നു.

പരാതി ലഭിച്ചതോടെ പരസ്യത്തിൽ മാറ്റം വരുത്തുകയോ, പരസ്യം പൂർണമായും പിൻവലിക്കുകയോ ചെയ്യാനാണ് അഡ്വെർടൈസിങ് സ്റ്റാൻഡേർഡ് കൗൺസിൽ നിർദേശിച്ചിരിക്കുന്നത്. പരസ്യം പിൻവലിക്കാമെന്ന് കമ്പനി അറിയിച്ചിട്ടുണ്ട്.