കോഹ്‍ലി വീണ്ടും സംപൂജ്യൻ; സീസണിൽ ഇത് മൂന്നാം തവണ

മുംബൈ: ഐ.പി.എല്ലിലെ ഈ സീസണിൽ മുൻ ബാംഗ്ലൂര്‍ നായകൻ വിരാട് കോഹ്‍ലിയുടെ കഷ്ടകാലം തീരുന്നില്ല. ഇന്ന് സൺറൈസേഴ്സ് ഹൈദരാബാദിനെതിരായ മത്സരത്തിൽ ഇന്നിം​ഗ്സിലെ ആദ്യ പന്തിലാണ് താരം സംപൂജ്യനായി മടങ്ങിയത്. ഒന്നാം ഓവർ എറിയാനെത്തിയ ഇന്ത്യൻ യുവബൗളർ ജ​ഗ്തീഷ സുജിത്തിന്റെ പന്തിൽ കെയിൻ വില്യംസണ് ക്യാച്ച് നൽകിയാണ് താരത്തിന്‍റെ മടക്കം. ഈ സീസണിൽ ഇത് മൂന്നാം തവണയാണ് കോഹ്‍ലി ​ഗോൾഡൻ ഡക്കാവുന്നത്.

മത്സരത്തിൽ ടോസ് നേടിയ ബാം​ഗ്ലൂർ ക്യാപ്റ്റൻ ഫാഫ് ഡുപ്ലെസിസ് ബാറ്റിം​ഗ് തെരഞ്ഞെടുക്കുകയായിരുന്നു. ഓപ്പണർമാരായി മൈതാനത്തെത്തിയത് ടീമിന്റെ മുൻനായകനും നിലവിലെ നായകനും. എന്നാൽ ഒരിക്കൽ കൂടി ആരാധകരെ ഞെട്ടിച്ച് കോഹ്‍ലി ഇന്നിം​ഗ്സിലെ ആദ്യ പന്തിൽ തന്നെ റണ്ണൊന്നുമെടുക്കാതെ വിക്കറ്റിന് മുന്നിൽ കുടുങ്ങി. 

ഈ സീസണിൽ മോശം ഫോം തുടരുകയായിരുന്ന കോഹ്‍ലി ​ഗുജറാത്തിനെതിരായ മത്സരത്തിൽ അർധസെഞ്ച്വറി നേടി വൻ തിരിച്ചു വരവ് നടത്തിയിരുന്നു. 53 പന്തിൽ നിന്ന് 58 റൺസാണ് താരം അന്ന് നേടിയത്. താരത്തിന്റെ മടങ്ങിവരവ് ആരാധകർ ആഘോഷമാക്കുകയും ചെയ്തു. എന്നാൽ ഒരിക്കൽ കൂടി കോഹ്‍ലി ആരാധകരെ നിരാശയിലേക്ക് തള്ളിയിട്ടിരിക്കുകയാണിപ്പോൾ. ഈ സീസണിൽ 12 മത്സരങ്ങളിൽ നിന്ന് 216 റൺസാണ് താരത്തിന്റെ ആകെ സമ്പാദ്യം. ആറ് മത്സരങ്ങളിൽ താരത്തിന് രണ്ടക്കം പോലും കടക്കാനായിട്ടില്ല.

കോഹ്‍ലി പുറത്തായെങ്കിലും പിന്നീട് ക്രീസിലെത്തിയ രജത് പട്ടീദാറും ഓപ്പണർ ഫാഫ് ഡുപ്ലെസിസും ചേർന്ന് ബാം​ഗ്ലൂർ സ്കോർ അതിവേ​ഗം ചലിപ്പിച്ചു. ഒടുവിൽ വിവരം കിട്ടുമ്പോൾ ഒമ്പത് ഓവറിൽ ഒരു വിക്കറ്റ് നഷ്ടത്തിൽ ബാം​ഗ്ലൂർ 85 റൺസെടുത്തിട്ടുണ്ട്.

 summary : Virat Kohli Registers 3rd Golden Duck