സന്തോഷ് ട്രോഫിയിൽ കേരളത്തിന് ഷോക്ക്; കർണാടകയോട് തോൽവി

ഭുവനേശ്വർ: സന്തോഷ് ട്രോഫിയിലെ രണ്ടാം മത്സരത്തിൽ ചാംപ്യൻമാരായ കേരളത്തെ ഞെട്ടിച്ച് അയൽക്കാർ. മറുപടിയില്ലാത്ത ഒരു ഗോളിനാണ് കേരളം കർണാടകയോട് തോൽവി ഏറ്റുവാങ്ങിയത്.

20-ാം മിനിറ്റിലാണ് കളിയിലെ ഏക ഗോൾ പിറന്നത്. വലതു വിങ്ങിൽനിന്നു ലഭിച്ച ക്രോസ് കർണാടകയുടെ അഭിഷേക് ശങ്കർ വലയിലാക്കുകയായിരുന്നു. പിന്നീട് ഒരു ഘട്ടത്തിലും പ്രതിരോധം കടന്ന് ഗോൾ കണ്ടെത്താൻ കർണാടക കേരളത്തെ അനുവദിച്ചില്ല.

നിരവധി തവണ മികച്ച അവസരങ്ങൾ കേരളത്തിനു മുന്നിൽ തുറന്നുവന്നു. എന്നാൽ, ഒന്നും ലക്ഷ്യത്തിലെത്തിക്കാനായില്ല. തോൽവിയോടെ ഗ്രൂപ്പ് 'എ'യിൽ കർണാടക ഒന്നാം സ്ഥാനത്തേക്ക് മുന്നേറി. കേരളം മൂന്ന് പോയിന്റുമായി രണ്ടാം സ്ഥാനത്താണ്.

ആദ്യ മത്സരത്തിൽ ഗോവയെ തകർത്ത ആത്മവിശ്വാസത്തിലാണ് ഇന്ന് കേരളം ഇറങ്ങിയത്. 3-2നായിരുന്നു ഗോവയ്‌ക്കെതിരെ കേരളത്തിന്റെ ജയം.

Summary: Kerala lost to Karnataka in a Group A match of the Hero Santosh Trophy 2023 🏆 #IndianFootball