'മെസിയല്ല, ഇതാ അയാള്‍'; തന്‍റെ പുതിയ അതിഥിയെ വെളിപ്പെടുത്തി ക്രിസ്റ്റ്യാനോ
തന്‍റെ അതിഥി ഇന്‍റര്‍നെറ്റ് റെക്കോര്‍ഡുകള്‍ തകര്‍ക്കുമെന്ന പ്രഖ്യാപനത്തോടെ റോണോ ദിവസങ്ങള്‍ക്ക് മുമ്പ് വീഡിയോ പങ്കുവച്ചിരുന്നു
Update: 2024-11-21 07:58 GMT
യൂട്യൂബിൽ ഫുട്ബോള്‍ ആരാധകര്‍ക്കിടയില്‍ തരംഗമാണ് പോർച്ചുഗീസ് സൂപ്പർ താരം ക്രിസ്റ്റ്യാനോ റൊണാൾഡോയുടെ ചാനല്‍. ആരംഭിച്ച് മണിക്കൂറുകൾ കൊണ്ട് തന്നെ മില്യൺ കണക്കിന് സബ്‌സ്‌ക്രൈബേഴ്‌സ് പിന്നിട്ട റോണോയുടെ ചാനൽ യൂട്യൂബിലെ സർവകാല റെക്കോർഡുകൾ പലതും കടപുഴക്കി. ഇതിനോടകം 67.3 മില്യൺ ആളുകൾ ചാനൽ സബ്സ്ക്രൈബ് ചെയ്ത് കഴിഞ്ഞു.
നാളുകള്‍ക്ക് മുമ്പാണ് തന്‍റെ ചാനലില്‍ എത്തുന്ന ഒരതിഥിയെ കുറിച്ച് റോണോ ഒരു വീഡിയോ പോസ്റ്റ് ചെയ്തത്. അതിഥി ആരാണെന്ന് വെളിപ്പെടുത്താതിരുന്ന താരം ആരാധകര്‍ക്ക് മുന്നില്‍ ഒരു സസ്പെന്‍സ് ഒരുക്കി കാത്തിരിക്കുകയായിരുന്നു. തന്‍റെ പുതിയ ഗസ്റ്റ് ഇന്‍റര്‍നെറ്റ് റെക്കോര്‍ഡുകള്‍ തകര്‍ക്കുമെന്ന പ്രഖ്യാപനത്തോടെയാണ് റോണോ വീഡിയോ പങ്കുവച്ചത്. താരത്തിന്‍റെ സുഹൃത്തും മുന്‍ ഫുട്ബോളറുമായ റിയോ ഫെര്‍ഡിനാന്‍റും പങ്കാളി ജോര്‍ജീനയുമടക്കമുള്ളവര്‍ ആരാണാ ഗസ്റ്റ് എന്ന് പലവുരു ചോദിച്ചിട്ടും റോണോ വെളിപ്പെടുത്താന്‍ തയ്യാറായില്ല.
അത് അര്‍ജന്‍റൈന്‍ സൂപ്പര്‍ താരം ലയണല്‍ മെസ്സിയാണെന്ന് വരെ പോയി ആരാധകരുടെ ചര്‍ച്ചകള്‍. ഒടുവില്‍ റോണോ തന്നെ ആ വലിയ അതിഥിയുടെ പേര് വെളിപ്പെടുത്തി രംഗത്തെത്തിയിരിക്കുകയാണ് ഇപ്പോള്‍. പ്രമുഖ യൂട്യൂബര്‍ മിസ്റ്റര്‍ ബീസ്റ്റാണ് റോണോയുടെ ചാനലില്‍ എത്താന്‍ പോവുന്ന ആ വലിയ പേര്. ഇന്ന് വൈകീട്ട് 7.30 ന് ക്രിസ്റ്റ്യാനോയും മിസ്റ്റര്‍ ബീസ്റ്റും തമ്മിലുള്ള സംഭാഷണം താരത്തിന്‍റെ യൂട്യൂബ് ചാനലില്‍ പബ്ലിഷ് ചെയ്യും. ഇപ്പോള്‍ തന്നെ വീഡിയോ ചാനലില്‍ പ്രീമിയര്‍ ചെയ്ത് വച്ചിട്ടുണ്ട്.
ബീസ്റ്റ് തീര്‍ത്ത പല റെക്കോര്‍ഡുകളും തകര്‍ത്തായിരുന്നു യൂട്യൂബിലേക്കുള്ള റോണോയുടെ രംഗപ്രവേശം. ഡയമണ്ട് ബട്ടണ്‍ എന്ന നാഴികക്കല്ലിലെത്താന്‍ ബീസ്റ്റ് എടുത്തത് 132 ദിവസമാണെങ്കില്‍ റോണോ വെറും പത്ത് മണിക്കൂറില്‍ അത് സ്വന്തമാക്കി. യൂട്യൂബില്‍ ഏറ്റവും കൂടുതല്‍ ആളുകള്‍ സബ്സ്ക്രൈബ് ചെയ്തിട്ടുള്ള ചാനലാണ് ബീസ്റ്റിന്‍റേത്. 331 മില്യണ്‍ സബ്സ്ക്രൈബേഴ്സാണ് ബീസ്റ്റിനുള്ളത്.